2024թ․-ի հոկտեմբերի 21-ի առավոտյան ՀՔԱՎ գրասենյակ է ահազանգել Ռուսաստանի Դաշնության քաղաքացի Ռոման Շկլովերը և հայտնել, որ զանգ է ստացել ոստիկանությունից, հրավիրվել բաժին։ Շկլովերը ինքնակամ ներկայացել է ՀՀ ոստիկանության Երևան քաղաքի Մետրոպոլիտենի պահպանության բաժին՝ ՌԴ իրավապահների կողմից հայտարարված հետախուզման հիմքով։
ՀՔԱՎ գրասենյակի փաստաբան Սամսոն Գալստյանը տեղում իրավական աջակցություն տրամադրելու նպատակով գնացել է ոստիկանության համապատասխան բաժին և ստանձնել է վերջինիս իրավունքների ու ազատությունների պաշտպանությունը։
Շկլովերը ձերբակալվել է հանցագործության համար, որը Հայաստանում չի համարվում քրեորեն հետապնդելի արարք։ Իրավապահ մարմինների որոշմամբ վերջինիս տեղափոխել են ձերբակալվածների պահման վայր։ Շկլովերի և մյուս օտարերկրյացիների ձերբակալումը հետևանքն է ԱՊՀ երկրների միջև փոխօգնության ապօրինի պայմանագրի։
ՀՔԱՎ գրասենյակը վերահաստատում է իր պահանջը՝ ՀՀ-ն պետք է չեղյալ հայտարարի փոխօգնության պայմանագիրը, քանի որ պայմանագրի այլ անդամ բռնապետական պետությունների կողմից քաղաքական շարժառիթներով հարուցվում են քրեական գործերը, հետախուզում է հայտարարվում, որի կատարումը Հայաստանի Հանրապետության տարածքում՝ ձերբակալում կամ կալանավորում, կհանդիսանա Հայաստանի Հանրապետության կողմից մարդու իրավունքների կոպիտ խախտում։ Ավելին այդ անձանց արտահանձնելու դեպքում ՀՀ-ն վտանգի տակ կդնի նրանց անվտանգությունն ու կյանքը։ Համաձայն ՀՀ Սահմանադրության, ներպետական օրենսդրության և ՀՀ կողմից վավերացրած միջազգային պայմանագրերի և կոնվենցիաների, ոչ ոք չի կարող հանձնվել օտարերկրյա պետությանը, անգամ եթե դա անձի քաղաքացիության պետությունն է, եթե լուրջ հիմքեր կան կասկածելու, որ այդ պետությունում անձը կարող է ենթարկվել խոշտանգումների, դաժան, անմարդկային կամ նվաստացնող պատժի կամ վերաբերմունքի:
Կարդացեք նաև
* Հելսինկյան քաղաքացիական ասամբլեայի Վանաձորի գրասենյակը միաժամանակ հայտնում է, որ բոլոր այն օտարերկրյա քաղաքացիները կամ քաղաքացիություն չունեցող անձինք, ովքեր իրենց ունեցած համոզմունքների պատճառով իրենց երկրում ենթարկվել են հետապնդումների և այժմ գտնվում են ՀՀ-ի կողմից իրենց արտահանձնելու իրավական խնդրի առաջ, կարող են դիմել Կազմակերպությանը՝ համապատասխան իրավական աջակցություն ստանալու համար։
Հելսինկյան քաղաքացիական ասամբլեայի Վանաձորի գրասենյակ
