«Տավուշի տարածքից սահմաններ տալը, մեր հայրենակիցների ունեցվածքը խլելը, թեկուզ կոմպենսացիա՝ կաշառք են տալիս հայրենիքի դիմաց, դա ապօրինի գործընթաց է: Սահմանադրությամբ ինձ վերապահված է իրավունք, որ իմ երկրից որեւէ տարածք առանց ինձ հարցնելու, այսինքն` առանց հանրաքվեի չի կարող տրվել ուրիշին կամ փոփոխության ենթարկվել»,-«Հայելի» ակումբում նշեց վավերագրող, հանրային գործիչ Հովհաննես Իշխանյանը՝ անդրադառնալով ԱԺ արտաքին հարաբերությունների նիստում՝ փոխվարչապետ Մհեր Գրիգորյանի գլխավորությամբ ՀՀ-ի եւ Ադրբեջանի միջեւ սահմանազատմանն ու սահմանագծման թեմայով քննարկումներին:
Նրա խոսքով. «Տարածքի հանձնման չեմպիոն Նիկոլ Փաշինյանը գնաց եւ միայն տեղի բնակիչների հետ խորհրդակցեց՝ ցույց տալով իբր դա միայն իրենց վերաբերող հարց է, մինչդեռ դա Հայաստանի յուրաքանչյուր քաղաքացուն վերաբերող հարց էր. այդ տարածքով ինտերնետն էր անցնում, այդտեղով Վրաստան էինք գնում, այդտեղ մեր էներգետիկ կապերն … Այս իշխանությունները դա փաթեթավորեցին իբրեւ գյուղի հարց՝ խախտելով մեր սահմանադրական իրավունքները… Ու այն, ինչ հիմա կատարվում է ԱԺ-ում, ապօրինի է: Ցավոք, մեր հանրության հանդեպ այնպիսի վայրագություններ են կատարվել, որ մեր հանրությունն այժմ դժվարանում է արձագանքել որեւէ ապօրինության… Բայց ես հույս ունեմ, որ մեր ժողովուրդն ի վերջո կօգտվի իր ապստամբության իրավունքից, այդ առկայծումը լինելու է. եւ դրան որեւէ քաղաքական գործիչ կամ ուժ չի կարողանալու խոչընդոտել»:
Հովհաննես Իշխանյանը կրկին ընդգծում է. «Մենք հիմա երկրի հակառակ կողմում ենք ապրում, եւ ամեն մի վատթարագույն բան այս իշխանությունները ներկայացնում են որպես ձեռքբերում: Թուրքական երեւակայության մեծ բագաժ է պետք դրա համար՝ այդպես ներկայացնելու համար… Ընկերներ, դուք պարզապես սահմանադրախախտ եք, հակաժողովրդավար եւ հակամարդկային…»:
Գոհար ՀԱԿՈԲՅԱՆ
