«Ազատություն». Հայաստանի աշխարհագրական դիրքն ու դրա ընձեռած հնարավորությունները բնական կամուրջ են Իրանի համար դեպի ԵԱՏՄ շուկա, «Իսնա» լրատվական գործակալությանը տված հարցազրույցում հայտարարել է Իրանում Հայաստանի դեսպան Արսեն Ավագյանն։
Անդրադառնալով Ադրբեջանի կողմի առաջ քաշված այսպես կոչված «Զանգեզուրի միջանցքին»՝ դիվանագետը շեշտել է՝ տարածաշրջանում խաղաղության և կայունության հաստատման կարևոր երաշխիքներից մեկը տրանսպորտային և տնտեսական ենթակառուցվածքների ապաշրջափակումն է, որը Հայաստանի կառավարության առաջնահերթություններից է, իսկ այդ գործընացի վերաբերյալ Հայաստանի կառավարության պատկերացումները, դեսպանի խոսքով, մանրամասն արտացոլված են Հայաստանի վարչապետի ներկայացրած «Խաղաղության խաչմերուկ» նախագծում:
Այս տարեսկզբին Բաքուն հայտարարեց, որ եթե «Զանգեզուրի միջանցքը» չբացվի, Ադրբեջանը Հայաստանի հետ սահմանը որևէ այլ կետում չի բացի։ Ալիևի խորհրդական Հիքմեթ Հաջիևն, իր հերթին, պնդել էր, թե Բաքուն, նման պահանջ դնելով, հիմնվում է 44-օրյա պատերազմից հետո ստորագրված եռակողմ հայտարարության վրա, որի 9-րդ կետն ասում է, թե Հայաստանը պետք է «անխոչընդոտ տեղաշարժ ապահովի Ադրբեջանի ու Նախիջևանի միջև»։ «Զանգեզուրի միջանցքի» բացման մասին պաշտոնական Բաքվի հայտարարություններին ի պատասխան՝ Երևանը մշտապես շեշտել է, որ «միջանցքային տրամաբանություն բանակցություններում չկա»:
Պաշտոնական Երևանն անընդունելի է համարում արտատարածքային որևէ միջանցքի առկայությունը, երեկ հայտարարել է Ավագյանն՝ ընդգծելով՝ հաղորդակցային ցանկացած ուղի պետք է լինի տվյալ երկրի ինքնիշխանության և իրավազորության ներքո, և գործի հավասարության ու փոխադարձության սկզբունքների հիման վրա:
Կարդացեք նաև
Շեշտելով, որ Հայաստանն իր տարածքում պատրաստ է լիովին ապահովել բեռների, տրանսպորտային միջոցների, մարդկանց անցման անվտանգությունը՝ դեսպանը վերահաստատել է՝ Երևանը պատրաստ է Ադրբեջանի և Նախիջևանի միջև կապն ապահովել ճիշտ այն պայմաններով, որով ապահովում է Իրանի Իսլամական Հանրապետությունը:
Նյութն ամբողջությամբ՝ սկզբնաղբյուր կայքում:
