Գյումրիում գիշերած վարչապետ Նիկոլ Փաշինյանն ինչպես ամենուր, այնպես էլ այս քաղաքում իր օրը սկսել է հեծանվային զբոսանքով։ Նա 25 կիլոմետր է անցել։
«Կեցցե՛ Գյումրին և կեցցե՛ հեծանիվը»,- իր սոցիալական էջում հրապարակած տեսանյութում ասում է վարչապետը։
Կարդացեք նաև
Նրա ներբեռնած տեսանյութից ակնհայտ է, որ նա եղել է «Կինո Երևան» թաղամասում, որտեղից երկրորդական փողոցներով դուրս է եկել դեպի Տիգրան Մեծ պողոտա։ Այնուհետ հեծանիվով հասել է քաղաքի կենտրոնական հատվածներ, նաև «Սլաբոդկա» թաղամաս։ Վարչապետի հեծանվային զբոսանքի ժամանակ Գյումրու փողոցները գրեթե դատարկ են․ մարդ չկա, լսվում են շների հաչոցներ։
Ի դեպ, տեղի է ունեցել «Քաղաքացիական պայմանագիր» կուսակցության Շիրակի մարզի աշխատանքային խմբի նիստը, որի ժամանակ Նիկոլ Փաշինյանը խոսել է պետության և անկախության՝ հաց ստեղծելու գործիք լինելու մասին։ Նա նշել է, որ բաց են թողել այդ կարևոր գործիքը։
«Մարդը պետություն է ստեղծում, որ ավելի լավ ապրի, չէ՞, հացը բարեկեցություն է, ուտելիքն ա, ազատություն ա, հացը արդարություն ա, հացը անվտանգությունն ա»,- ասել է Փաշինյանը։
Փաշինյանը Գյումրի այցելելիս միշտ մնում է Վարդանանց հրապարակում գտնվող Խաչատուր Սուքիասյանին պատկանող «Վիկտորիա» հյուրանոցում։ Հենց նոր ականատեսները մեզ փոխանցեցին, որ Վարդանանց հրապարակում վարչապետի անվտանգությունը հսկելու համար ամեն մի 10 մետրի վրա մի ոստիկան է կանգնած։ Նա ամենայն հավանականությամբ պատրաստվում է հեռանալ Գյումրիից։
Նունե ԱՐԵՎՇԱՏՅԱՆ
