Այն հիվանդությունը, որ արձանագրված է Գագիկ Խաչատրյանի մոտ, արդեն կյանքին է վտանգ սպառնում, եթե վիրահատության չենթարկվի: Դա հաստատվեց նաեւ դատարանում փորձագետների հարցաքննությամբ: Այս մասին այսօր ՊԵԿ նախկին նախագահ Գագիկ Խաչատրյանի գործով դատական նիստից հետո լրագրողներին ասաց Խաչատրյանի պաշտպան Երեմ Սարգսյանը:
«Եթե այն ժամանակ իր ոտքով էր շարժվում, հետո՝ ձեռնափայտով, հետո՝ անվասայլակով, հիմա՝ պատգարակով… մենք ասում էինք՝ ընկերներ, մասնագետներն ասում են՝ վիրահատություն պիտի կատարվի, որ հաշմանդամության վիճակին չհանգեցնի: Իրենք ձգեցին, հանգեցրին այս վիճակին: Հիմա այնպիսի վիճակ է, որ բոլորն ասում են՝ մեծ հարց է` հաշմանդամությունը կարող ենք շտկել թե՝ ոչ, հիմա կյանքի խնդիր է: Ամեն պահ կարող է մահ առաջանա: Հիմա փորձագետն ասում է՝ ժամերի, օրերի վտանգ կա»,- հավելեց փաստաբանը :
Նա նկատեց, որ պետությունը, որպես Եվրոպական կոնվենցիան վավերացրած մարմին, պարտավոր է անձի կյանքի իրավունքն ապահովել. «Եթե ունես պատասխանատվություն ու թույլ չես տալիս անձին գնալ բուժման, իսկ ՀՀ-ում էլ հնարավորություն չունես ապահովելու, ուրեմն դու ես պատասխանատուն լինելու կյանքի իրավունքի: Եվրոպական դատարանը հարց է բարձրացրել՝ այսքան ժամանակ, որ թույլ չես տվել գնա բուժման, արդյոք սա կոնվենցիայի 2-րդ հոդվածի խախտում չէ՞: Իսկ երկրորդ հոդվածը շատ լուրջ հոդված է: Ասում է նաեւ՝ արդյոք 3-րդ հոդվածի խախտում չէ, որը անմարդկային վատ վերաբերմունքի մասին է: Էդ որ էդ վիճակում բերում էիք դատարան, բերման էիք ենթարկում՝ չի՞ հանգեցնում նվաստացուցիչ վերաբերմունքի: Եթե դատարանում սանհանգույց չկա, մարդը սանհանգույցի կարիք ունի, որտեղ պետք է օգտվի»:
Հիշեցնենք, որ Գագիկ Խաչատրյանը մեղադրվում է պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման եւ պաշտոնեական կեղծիքի համար։
Կարդացեք նաև
Արփինե ՍԻՄՈՆՅԱՆ
Լուսանկարը՝ արխիվային
