Մանկավարժական համալսարանի գրադարանի ընթերցասրահում հոկտեմբերի 15-ին տեղի ունեցավ ՀՀ ժուռնալիստների միության անդամ, արձակագիր, լրագրող Մելանյա Պետրոսյանցի գրքերի՝ «Օրենքով գող», «Ոստիկանը» եւ՝ «Մեր ժամանակները. Սեր եւ հուսախաբություն» գրքերի շնորհանդեսը: Վերջին գիրքը՝ «Մեր ժամանակները» դետեկտիվ ժանրի է:
Մ. Պետրոսյանցի դետեկտիվ գրքին անդրադառնալով նշել էինք. «Մելանյա Պետրոսյանցը քթիցդ բռնած տանում է հանցագործության հնարավոր վայրերով ման տալիս, ապա անսպասելի, այնպիսի բացահայտում է անում, որ չես հասցնում այդ պահին հասկանալ, ոնց, ոնց էլի… Մի շատ հետաքրքիր, անգամ սիրվող կերպար կա այս գրքում. տիկին Նունեի: Այս կինն օգնում է մասնավոր դետեկտիվին: Կոլորիտային նկարագրով այս կինը՝ Նունեն, ասես բրիտանական դետեկտիվ ակումբի նախագահ, 82 դետեկտիվ վեպերի հեղինակ Ագաթա Քրիստիի արարած կերպարների հայ նախատիպը լինի»:
ԵՊՀ դոցենտ Նաիրա Գասպարյանն իր խոսքում ասաց. «Լինելով քրեական գեղարվեստական ուղղվածության ենթաժանր, հայկական պետրոսյանցական դետեկտիվը տարբերվում է ընդունված համաշխարհային դետեկտիվից հենց թեկուզ միայն նրանով, որ դետեկտիվ ենթաժանրի զարգացումները՝ սկսած անտիկ շրջանից, չինական եւ եվրոպական, ամերիկյան համանուն ժանրից, հայկականում գլոբալ համատեքստում որոշակի անկրկնելի ազգային երանգներ են ձեռք բերում Մելանյա Պետրոսյանցի շնորհիվ: Այստեղ առեղծվածի լուծումը թվում է՝ թե հեռու է, բայց որոշակի չնախատեսված իրադրություններ տանում են դեպի հանգուցալուծում։ Պետրոսյանցական դետեկտիվն առանձնանում է նրանով, որ այն ընթանում է ժամանակակից գլոբալ զարգացումներին համահունչ՝ արտացոլվելով տիկին Մելանյայի գործերում՝ ըստ անհրաժեշտության: Պուարոյի, Հոլմսի, Ագաթա Քրիստիի հերոսները խամրում են տիկին Մելանյայի ստեղծած վառ անհատ-հերոսների համեմատությամբ»:
Գրքի հերոսներից մեկը՝ «Գաբիելյան ընդ փարթներս դետեկտիվ բյուրոյի» հիմնադիր Հայկ Գաբիելյանն ասաց. «Տիկին Մելանյայի պատմվածքներում պրոֆեսիոնալիզմով հագեցած են մեկնաբանվում դեպքերն ու հանգամանքները, որ չճանաչելու պարագայում կմտածես, հեղինակը բազմամյա փորձառու քննիչ է»:
Անշուշտ, գրքերից տպավորված շատերն էին ուզում խոսք ասել` Մելանյա Պետրոսյանցի գրական վաստակի, գրքերի, դետեկտիվ պատմվածքների մասին: Իրենց տպավորությունները կիսեցին հրապարակախոս, արձակագիր Վրեժ Սարուխանյանը, բանաստեղծ Հովիկ Սարոյանը, հոգեբանական գիտությունների դոկտոր, Արցախի Ազգային ժողովի պատգամավոր Արզիկ Մխիթարյանը…
Ռուզան ՄԻՆԱՍՅԱՆ
«Առավոտ» օրաթերթ
17.10.2024
