Համացանցում հայտնվել է մի հաղորդագրություն, ըստ որի՝ Ադրբեջանը պահանջում է Հայաստանի հանքարդյունաբերության մոնիտորինգը, որին կմասնակցեն միջազգային եւ ադրբեջանցի մասնագետները: «Պահանջը» հնչեցրել է ինչ-որ երկրորդական պաշտոնյա՝ Էկոնոմիկայի նախարարությանը կից հասարակական խորհրդի նախագահ:
Բնական զուգահեռ է առաջանում մոտ երկու տարի առաջ տեղի ունեցած իրադարձությունների հետ, երբ 2022 թվականի դեկտեմբերի 12-ին Արցախի շրջափակումը սկսել էին ադրբեջանցի «բնապահպանական ակտիվիստները», որոնք իբր բողոքում էին Արցախում գործող հանքավայրերի դեմ: Ռուս «խաղաղապահների» բացարձակ թողտվության պայմաններում իրագործվող շրջափակումը մեկնարկեց այն բանից հետո, երբ նույն թվականի հոկտեմբերին Պրահայում Փաշինյանը ճանաչեց Արցախը որպես Ադրբեջանի մաս:
Հիշեցնեմ նաեւ, որ շրջափակումը սկսվելուց 4 օր անց՝ 2022-ի դեկտեմբերի 16-ին, Հայաստան էր ժամանել եւ վարչապետի հետ էր հանդիպել Մեծ Բրիտանիայի գաղտնի հետախուզական ծառայության ղեկավար Ռիչարդ Մուրը: Ավելի վաղ տեղեկություններ էին շրջանառվում, որ Ալիեւի հրամանագրով Արցախի Դրմբոնի եւ Կաշենի հանքավայրերն արդեն իսկ տրվել էին բրիտանական Anglo Asian Mining ընկերությանը: Իսկ բրիտանական հետախուզությունը եւ դիվանագիտությունը ավանդաբար սպասարկում են նախեւառաջ երկրի տնտեսական շահերը:
Բացառված չէ, որ Հայաստանի Հանրապետության հանքավայրերի հետ կապված նույնպես կան հեռահար տնտեսական ծրագրեր: Բայց այս «պահանջների» մոտակա նպատակները պարզ են՝ ճնշում գործադրել Հայաստանի տնտեսության վրա: Եթե դրան գումարենք Հայկական ատոմակայանի հետ կապված շահարկումները, Հայաստանի «զինվելու» դեմ բողոքները, սահմանադրությունը փոխելու պահանջը եւ այլն, կարելի է փաստել, որ Ադրբեջանը նպատակաուղղված աշխատում է հայկական պետականությունը կազմաքանդելու վրա:
Կարդացեք նաև
Պաշտոնապես երբեմն ասվում է, որ Ալիեւը պարզապես վրեժ է լուծում 1994-2020 թվականների նվաստացման համար: Գուցե դա էլ կա: Բայց զուտ քաղաքական առումով նրա նպատակն է Հայաստանի լիակատար կապիտուլյացիան, այսինքն՝ հայկական պետության լուծարումը: «Խաղաղության օրակարգի», «խաղաղության խաչմերուկի» կամ «խաղաղության պայմանագրի» մասին խոսելիս, դա պետք է հաշվի առնել:
Արամ ԱԲՐԱՀԱՄՅԱՆ
