Երիտասարդ, բայց արդեն հանդիսատեսի համակրանքը վայելող «Ավետիս» լարային քառյակի հայաստանյան և արտերկրյա ակտիվ համերգային ծրագրում առանձնահատուկ տեղ է զբաղեցնում քառյակի դեբյուտը Հայաստանի ազգային ֆիլհարմոնիկ նվագախմբի Երևանյան 16-րդ միջազգային երաժշտական փառատոնում (գեղարվեստական ղեկավար Էդուարդ Թոփչյան):
Հոկտեմբերի 11-ին քառյակը ելույթ ունեցավ Մատենադարանում՝ յուրահատուկ ծրագրով: Փառատոնի այս տարվա ծրագրում հատուկ ուշադրություն է ընձեռված չեխ կոմպոզիտորների ստեղծագործություններին: «Ավետիս» լարային քառյակը ներկայացրեց «Իմ կյանքից» խորագրով համերգը՝ նվիրված Բեդրժիխ Սմետանայի 200-ամյակին: Հնչեցին Սմետանայի «Իմ կյանքի պատմությունից» թիվ 1 լարային կվարտետը և Անտոնին Դվորժակի «Ամերիկյան» կոչվող թիվ 12 լարային կվարտետը:
Կարդացեք նաև
Նշենք նաև, որ մինչ համերգը, «Հիշողության կերպարանքները» միջազգային սեմինարի շրջանակում Մատենադարանում բացվեց ձեռագրերի կենսաքիմիական հետազոտության լաբորատորիան։ Ժապավենը կտրելու պատիվը վերապահվել էր ՀՀ ԿԳՄՍ նախարար, Մատենադարանի հոգաբարձուների խորհրդի նախագահ Ժաննա Անդրեասյանին և «Արարատ» բանկի խորհրդի նախագահ Գրիգոր Հովհաննիսյանին։ Միջոցառմանը ներկա էին դիվանագիտական ներկայացուցչությունների ղեկավարներ, բարերարներ, մշակութային և հասարակական գործիչներ, գործընկեր կառույցների ղեկավարներ:
Բացման արարողությանը հաջորդել է «Մատենադարանի ճառագող առաքելությունը» խորագրով ցուցադրությունը, որտեղ ներկայացվել են Հայաստանի տարբեր կառույցների՝ Մատենադարանի աշխատակիցների վերականգնած նմուշները՝ ձեռագիր, կտավ, արխիվային փաստաթղթեր, թանգարանային այլ առարկաներ։ Երեկոյի եզրափակիչ ակորդը հանդիսացավ «Ավետիս» լարային քառյակի ելույթը:
Քառյակի առաջին ջութակահար Անուշ Նիկողոսյանը մեզ հետ զրույցում նշեց. «Մեծ պատիվ է մեզ համար առաջին անգամ ելույթ ունենալ Երևանյան միջազգային երաժշտական փառատոնի շրջանակում, այն էլ նման պատմական և մշակութային օջախում՝ Մատենադարանում: Հայ հանդիսատեսի առջև նվագելը միշտ կրկնակի պատասխանատվություն է: Մեր գրեթե մեկամյա ակտիվ գործունեության ընթացքում Հայաստանում արդեն ունենք մեր մշտական և սիրելի ունկնդիրը, ովքեր սպասում են մեր համերգներին: Դա մեզ համար մեծ ուրախություն է: Մենք ինքներս էլ տեսնում ենք, որ աշխատանքային պրոցեսում ավելի ու ավելի լավ ենք իրար զգում: Բոլորս էլ ներգրավված ենք մենակատարի և նվագախմբային գործունեության մեջ, բայց քառյակով նվագելը մեր մեծ երաժշտական սերն է, որի շուրջ էլ համախմբվել ենք և քրտնաջան աշխատանքը տալիս է իր արդյունքները»:
Առաջիկայում «Ավետիս» լարային քառյակը ծավալուն համերգային և կրթական ծրագրերով հանդես կգա Հայաստանի մարզերում, դեկտեմբերին դաշնակահար Հայկ Մելիքյանի հետ կներկայացնեն համերգային ծրագիր՝ նվիրված ՀՀ վաստակավոր ուսուցիչ, ջութակահար Պետրոս Հայկազյանի 100-ամյակին, իսկ 2025-ին քառյակը ելույթներով կրկին հանդես կգա Իտալիայի Մանտուա քաղաքում կայացող «Տռամե Սոնորե» (Trame Sonore) միջազգային փառատոնում (նախորդ բեմելը 2024-ի մայիսին էր), ինչպես նաև առաջին անգամ հանդես կգա Մոդենայի Պավարոտիի անվան օպերային թատրոնում:
Աստղիկ ԴԱԼԼԱՔՅԱՆ
Սամվել ԴԱՆԻԵԼՅԱՆ
