«Հանրային լսումները շատ կարեւոր մեխանիզմ է՝ բարձրաձայնելու ու լսելու հասարակության մեջ տեղի ունեցող հարցադրումները եւ եւս մեկ անգամ շեշտադրելու, թե որն է մեր քաղաքականությունը հանցավորության, թմրամիջոցների դեմ պայքարի առումով։ Իհարկե, բոլորս էլ ակնկալում ենք, որ թե հանրային լսումները, թե ընդհանրապես քաղաքական դիսկուրսը մեր երկրում շատ ավելի հանգիստ, կառուցողական, ավելի բովանդակությանը վերաբերելի պետք է լինի»,- կառավարության այսօրվա նիստից հետո լրագրողներին ասաց առողջապահության նախարար Անահիտ Ավանեսյանը՝ անդրադառնալով խորհրդարանում ՔՊ-ական պատգամավորների եւ ՔԿ ղեկավար Արգիշտի Քյարամյանի միջեւ տեղի ունեցած միջադեպին։
Հարցին, թե մտավախություն չունի՞, որ ՔՊ-ական պատգամավորներն իր դեմ էլ ստորագրահավաք կնախաձեռնեն, Անահիտ Ավանեսյանը պատասխանեց․ «Ոչ, մտավախություն չունեմ»։
Անդրադառնալով սեզոնային գրիպի մասին հարցին՝ նախարարն ասաց, որ այս պահին ակտիվություն չկա, սեզոնին բնորոշ է, բայց հանգիստ իրավիճակ է։ «Բայց սա չի նշանակում, որ առջեւում դեռ նման ռիսկ չունենք։ Ուստի եւս մեկ անգամ հորդորում եմ՝ համեցեք, պատվաստվեք սեզոնային գրիպի դեմ»,- նշեց նա։
Ռոզա ՀՈՎՀԱՆՆԻՍՅԱՆ
Կարդացեք նաև
Լուսանկարը՝ ՔՊ ֆեյսբուքյան էջից. Անահիտ Ավանեսյանը կուսակցության վարչության նիստում
