Սամվել Բալասանյանի կրտսեր որդու՝ Խաչատուր Բալասանյանի, Գյումրու նախկին ու ներկա փոխքաղաքապետեր Ռուբեն Սանոյանի ու Սուրեն Ջանոյանի ձերբակալումներից զատ, ձերբակալման որոշում է կայացվել նաև ԱՄՆ-ում բուժման նպատակով գտնվող Գյումրու նախկին քաղաքապետ Սամվել Բալասանյանի նկատմամբ։
Այս մասին 1Lurer.am-ին տված հարցազրույցում հայտնել է ՀՀ ՔԿ ՀԿԳ ՔԳՎ ընդհանուր բնույթի և ընտրական հանցագործությունների քննության վարչության պետի տեղակալ Վաչե Մխիթարյանը։
Ինչպես ավելի վաղ գրել էր Aravot.am-ը, հղում տալով իր աղբյուրներին ու մեջբերելով խմբագրության ձեռքի տակ հայտնված քրեական վարույթից մի դրվագ, Սամվել Բալասանյանի նկատմամբ հանրային քրեական հետապնդում է հարուցվել «Սև Բերդ» պատմամշակութային ամրոցի՝ պետական սեփականություն հանդիսացող, սեփականաշնորհման չենթակա հարակից հողերը օտարելու մեղադրանքով։
«Քանի որ այդ հողատարածքները պետական սեփականություն էին հանդիսանում և տրված էին ՀՀ Պաշտպանության նախարարությանը՝ անհատույց օգտագործման իրավունքով, Սամվել Բալասանյանը իր հետ փոխկապակցված անձի՝ Սուրեն ՍԵպուհի Ջանոյանի միջոցով Պաշտպանության նախարարությունից ձեռք է բերել տվյալ հողատարածքը։ Մեկ տարի անց ձևական առուվաճառքի արդյունքում տվյալ հողատարածքը Սուրեն Սեպուհի Ջանոյանը վաճառել է Խաչատուր Սամվել Բալասանյանին», -եթերում պարզաբանել է Վաչե Մխիթարյանը՝ հավելելով, որ 2019 թվականին հոկտեմբերին նույն սխեմայով ձևական առուվաճառքով հողամասի մի հատվածն էլ դարձել է Սամվել Բալասանյանի փոխկապակցված անձի՝ Սիրական Մկոյանի սեփականությունը ու երկու ամիս անց դարձյալ օտարվել է Խաչատուր Բալասանյանին։
Կարդացեք նաև
Սամվել Բալասանյանը որպես մեղադրյալ է ներգրավել պաշտոնեական լիազորությունները չարաշահելու ու երկու դրվագով խոշոր չափով փողերի լվացման համար։ Որդին ևս որպես մեղադրյալ է ներգրավվել՝ երկու դրվագով խոշոր չափ փողերի լվացման համար։
Քրեական վարույթով անցնում է հինգ անձ։
Վաչե Մխիթարյանը հավելել է, որ ոստիկանությանը հանձնարարվել է Սամվել Բալասանյանին ներկայացնել վարույթն իրականացնող մարմնին։
