ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանն այսօր լրագրողների հետ ճեպազրույցում նշեց, որ ինքը չի հիշում, որ Ազգային ժողովը ուժային կառույցների հետ նման ծավալի քննարկում այսպես միասնական արած լինի: «Ընդ որում, ի պատիվ ուժային կառույցների, բերվել են կատարված աշխատանքի, նաեւ թերացումների եւ դրանց հաղթահարման ուղիների հետ կապված շատ պատրաստված զեկույցներ: Դա շատ լուրջ գործընթաց է: Ափսոսում եմ, որ քաղհասարակության շատ ներկայացուցիչներ, որոնք հրավեր ունեցել էին, բայց չէին եկել: Սակայն Դենիել Իոաննիսյանը, ի պատիվ իրեն, կարողացավ նաեւ որպես խաղաղության աղավնի, հանգուցալուծել այն բարդ իրավիճակը, որն առաջացավ Հովիկ Աղազարյանի եւ Արգիշտի Քյարամյանի միջեւ:
Բայց լրատվամիջոցներդ վերցրեցիք այդ փոքր կտորը՝ տեղի ունեցած անախորժությունը, եւ այդ յոթ ժամվա միջից առանձնացրիք դա՝ մեր հասարակությանը հնարավորություն չտալով, որպեսզի ինքը վայելի կատարված աշխատանքը: Անվտանգության մարմինները բոլորինս են եւ նրանց թերացումները վաղն անդրադառնալու են յուրաքանչյուրիս վրա»,-ասաց նա:
Հարցին, թե, այնուամենայնիվ, ինչպե՞ս է գնահատում Արգիշտի Քյարամյանի արձագանքը Հովիկ Աղազարյանին, իշխանական պատգամավորը պատասխանեց. «Ես կարծում եմ, որ ցանկացած պաշտոնյա պետք է լինի շատ զուսպ: ԱԺ-ն ներկայացուցչական ամենաբարձր մարմինն ու հարթակն է: Ազգային ժողովում բոլորը ինչ ասես, կարող են խոսել: Դուք ինձ ինչքան սուր հարցադրումներ եք անում, կամ պատգամավորներ կան, որ հնչեցնում են: Մեր խնդիրն է՝ լսել: ԱԺ-ն խոսելու տեղ է. խոսել, լսել ու հակադարձել եւ այնպես անել, որ անձնական վիրավորանքների դաշտ չմտնենք: Միջավայրը, պետական ընկալումները տղայական մոտեցումները մերժում են: Եվ դա է պատճառը, որ միշտ խոսվում է պետականության, պետական ինստիտուտների կարեւորության, բարեվարքության եւ բազմաթիվ այլ խնդիրների մասին: Ես անձամբ ուզում եմ այդ ամենը տեսնել ուժային բոլոր կառույցներում եւ տեսնում եմ դրա զարգացումները՝ բանակից սկսած»:
Կարդացեք նաև
Անդրանիկ Քոչարյանն ասաց, որ Արգիշտի Քյարամյանի հարցը ՔՊ խմբակցությունում դեռ չի քննարկվել, բայց կարծիք հայտնեց, որ խմբակցությունը այդ հարցերին անպայման անդրադարձ կունենա: Իսկ թե խնդիրը հետեւանք կունենա՞, չկարողացավ ասել:
Նրա պատկերացմամբ, հատկապես ուժային կառույցների ղեկավարները պետք է բարեվարքության պահանջները պահպանեն: «Վերջին հաշվով Աղազարյանը տարիքով էլ է մեծ: Նա այն Աղազարյանն է, որը մեզ էլ առավոտից իրիկուն միշտ անհարմար վիճակների մեջ է դնում: Էդպես որ լիներ, պետք է բոլորս դանակն առնենք, Աղազարյանին դանակահարենք: Այդպես չի լինում: Պատգամավոր է, ունի իր կարծիքը նաեւ սուր արտահայտելու իրավունք: Բայց երբեք չի կարելի պատգամավորին ենթարկել ճնշման՝ իր տղայի հետ կապված քրեական հոդվածների լեզվով»,-ասաց հանձնաժողովի նախագահը:
Թե ինչու էր գլխավոր դատախազը վերեւում նստել, իսկ մյուս ուժային կառույցների առաջին դեմքերը՝ ներքեւում, Անդրանիկ Քոչարյանը նշեց, որ չգիտի, թե արարողակարգային օրենքը ոնց է կարգավորում այդ հարցը: «Եթե խնդիր կար, արարողակարգից որեւէ մեկը այդպիսի հարց կդներ: Բայց ես նայում էի, որ հրավիրվածների մեջ միակ կինը նա է, գլխավոր դատախազն է, մեր՝ քաղաքական մեծամասնության կողմից ընտրված պաշտոնյա, որն այս միջավայրի հիմնական վերահսկողն է: Եվ կարծում եմ, որ դա արդարացված էր»:
Աշոտ ՀԱԿՈԲՅԱՆ
