Երեւանի ավանու «Քաղաքացիական պայմանագիր» խմբակցությունը մտադիր է ընդդիմադիր «Ազգային առաջընթաց» խմբակցության անդամ Պեդրո Զարոկյանին մանդատից զրկելու գործընթաց նախաձեռնել։ «Առավոտի» տեղեկություններով՝ այս հարցը ՔՊ-ում քննարկվել է երեկ՝ Երեւանի ավագանու նիստում տեղի ունեցած միջադեպից հետո։ Համենայնդեպս, մեր աղբյուրը պնդեց, որ հարցը ՔՊ-ի օրակարգում է։
Հիշեցնենք, որ Երեւանի ավագանու երեկվա նիստում վեճ տեղի ունեցավ ավագանու ընդդիմադիր եւ իշխանական անդամների միջեւ։ Ավագանու ընդդիմադիր անդամ Պեդրո Զարոկյանը հարց ուղղեց քաղաքապետ Տիգրան Ավինյանին՝ Հայաստանի պետական հետաքրքրությունների ֆոնդի՝ ANIF-ի չարաշահումների մասին՝ զուգահեռելով Երեւանի դպրոցներում անմխիթար վիճակի քննադատությամբ։ Զարոկյանը նկատել էր, որ ըստ տարածված մեղադրանքի, Տիգրան Ավինյանը անվտանգության աշխատակիցներ է ընդունել մի շենքում աշխատելու համար, որն արդեն իսկ ուներ անվտանգության ծառայություն։ «Անամոթներ, գոնե դպրոցների ճանապարհների փոսերը լցրեք»,- վրդովվեց նա՝ հայտարարելով, թե տպավորություն ունի, որ յուրացված գումարները ՔՊ-ում «իրար մեջ են բաժանում»։
Քաղաքապետ Տիգրան Ավինյանը կոշտ արձագանքել ու նկատողություն էր հայտարարել Զարոկյանին։
Այնուհետեւ Երեւանի ավագանու ՔՊ խմբակցության ղեկավար Արմեն Գալջյանը լրագրողների հետ ճեպազրույցում ասել էր, որ Պեդրո Զառոկյանը հոգեկան խնդիրներ ունի: Լրագրողների հարցին, թե որտեղի՞ց դա գիտի, նա պատասխանել էր. «Դե հիմա դա տեսնում ենք, պետք չէ դրա մասին թուղթ ունենալ: Սա բոցաշունչ ելույթ չէր, չգիտեմ՝ ինչ էր»:
Կարդացեք նաև
«Առավոտը» ավագանու ՔՊ խմբակցության ղեկավար Արմեն Գալջյանից փորձեց ճշտել՝ եղե՞լ է նման քննարկում եւ ի՞նչ հիմքով են փորձելու ավագանու ընդդիմադիր անդամին զրկել մանդատից։ Արմեն Գալջյանը, սակայն, չպատասխանեց մեր հեռախոսազանգերին։
Ռոզա ՀՈՎՀԱՆՆԻՍՅԱՆ
