«Ամերիկայի ձայն». Սպասվում է, որ այս տարի աշխարհի ընդհանուր պարտքը կհասնի ռեկորդային 100 տրիլիոն դոլարի, երեքշաբթի ասաց ԱՄՀ-ն՝ նախազգուշացնելով, որ շատ երկրների հարկաբյուջետային հեռանկարը կարող է «սպասվածից ավելի վատ լինել»: Հարկաբյուջետային քաղաքականության վերաբերյալ իր նոր զեկույցում ԱՄՀ-ն ասում է, որ ակնկալում է, որ համաշխարհային պետական պարտքն այս տարի կկազմի համաշխարհային ՀՆԱ-ի 93 տոկոսը և մինչև 2030 թվականը կմոտենա ՀՆԱ-ի 100 տոկոսին:
«Համաշխարհային պետական պարտքը շատ բարձր է», – զեկույցի հրապարակումից առաջ լրագրողներին ասել է ԱՄՀ-ի հարկաբյուջետային հարցերի բաժնի փոխտնօրեն Էրա Դաբլա-Նորիսը:
«Շատ լուրջ պատճառներ կան ենթադրելու, որ պարտքի բեռը կամ պարտքի հեռանկարը կարող է ավելի վատ լինել, քան սպասվում էր», – ասաց նա՝ հավելելով. «Ժամանակն է, որ երկրները կարգի բերեն իրենց բյուջեները»
Ըստ ԱՄՀ-ի գնահատականների՝ ծայրահեղ անբարենպաստ սցենարի դեպքում համաշխարհային պետական պարտքը երեք տարում կարող է հասնել ՀՆԱ-ի 115 տոկոսի, ինչը գրեթե 20 տոկոսային կետով գերազանցում է ներկայիս կանխատեսումը։
«Պետական փոխառությունների արժեքի տատանումները տարբեր երկրներում ավելի ու ավելի են պայմանավորված համաշխարհային գործոններով», – ասվում է զեկույցում: «Սա ցույց է տալիս, որ բարձր պարտքի մակարդակը և հարկաբյուջետային և դրամավարկային քաղաքականության անորոշությունը համակարգային կարևոր երկրներում կարող են մեծացնել սուվերեն պարտատոմսերի եկամտաբերության տատանողականությունը և այլ երկրների պարտքային ռիսկերը»:
Պարտքի կայունացման կամ կրճատման հավանականության համար անհրաժեշտ է կուտակային հարկաբյուջետային ճշգրտում (բյուջեի դեֆիցիտի կամ պարտքի մակարդակի կրճատում) միջինում ՀՆԱ-ի 3-ից 4,5 տոկոսի չափով, ասել է ԱՄՀ-ն: Սա գրեթե կրկնակի գերազանցում է նախորդ ճշգրտումների չափը:
