Երեւանի համար 61 մանկապարտեզի (նախկինում թիվ 312 մսուր-մանկապարտեզ) շենքը կառուցվել է 1987 թ.-ին: Այն վերանորոգվել է 2022-2024 թթ-ին եւ վերջապես իր դռներն է բացել երեխաների առաջ:
Aravot.am-ի հետ զրույցում մանկապարտեզի սաների մի խումբ ծնողներ դժգոհեցին, որ մանկապարտեզի տնօրենը ժողով է հրավիրել եւ առաջարկել, որ ծնողները ոչ միայն երեխաների անկողինը բերեն, այլ սպասքը: «Նախկինում այլ մանկապարտեզներում ոչ մի նման խնդիր չի եղել, պատահել է, որ ասել են, եթե ուզում եք, կարող ենք փոխնորդ անկողին բերել, հիմա անգամ ափսե ու գդալ չունեն»,-նեղսրտեց ծնողներից մեկը: Ասաց նաեւ, որ մանկապարտեզը արտաքինից նորոգ է, բայց ներսում հին գույք է օգտագործվում:
Թեմայի վերաբերյալ մեկնաբանություն խնդրեցինք մանկապարտեզի տնօրեն Աննա Մարգարյանից : «Ծնողական ժողովին ընդամենը բարձրաձայնվել է, որ քաղաքապետարանի միջնորդությամբ սպասք եւ անկողնային պարագաներ մենք ստանալու ենք: Այս պահին ունենք մեր հին անկողնային պարագաները, որոնք կարող ենք օգտագործել, մինչեւ նորը ստանանք: Ծնողների մի մասը նեղսրտեց, թե ինչու պետք է մեր երեխաները օգտագործված սպիտակեղենի վրա քնեն: Ասել եմ՝ ըստ ցանկության, կարող եք յուրաքանչյուրդ ձեր բալիկի համար նոր անկողնային պարագաներ եւ նոր սպասք բերել, հակառակ դեպքում մանկապարտեզը կտրամադրի իր ունեցածը:
Կարդացեք նաև
Ծնողների մի մասը նպատակահարմար չգտավ մասնակից լինել, եւ մենք մեր ունեցածով սպասարկեցինք երեխաներին, մի մասն էլ թարմ անկողնային պարագաներ եւ սպասք բերեց: Ունենք ծնողներ, որոնք առաջին բալիկին են բերում մանկապարտեզ եւ չեն ցանկանում, որ երեխան օգտագործած որեւէ բանի հետ առնչվի;
Ի դեպ, նախապես գրություն է ուղարկվել քաղաքապետարան, որ մանկապարտեզը նախկինում աշխատել է 8 խմբով, այս պահին՝ 10 խմբով է, իսկ հետո 12 խմբով ենք աշխատելու, դիմել ենք, որ մեզ մատակարարեն անհրաժեշտ չափով: Մանկապարտեզը յուրաքանչյուր բալիկի համար պետք է ունենա սպիտակեղենի առնվազն երկու օրինակ, մանկապարտեզում եղածը օգտագործում ենք որպես երկրորդ օրինակ, ծնողների բերածը՝ երկրորդի լրացումն է, մինչեւ քաղաքապետարանը մեզ կհատկացնի»,-պարզաբանեց մանկապարտեզի տնօրենը:
Գոհար ՀԱԿՈԲՅԱՆ
