2024թ. հոկտեմբերի 14-ին Հայաստանի օպերայի և բալետի ազգային ակադեմիական թատրոնում, Ժողովրդական երաժշտության և պարի ազգային կենտրոնի նախաձեռնությամբ և Հայաստանի Հանրապետության կրթության, գիտության, մշակույթի և սպորտի նախարարության աջակցությամբ կայացավ Սերգեյ Փարաջանովի 100-ամյակին նվիրված` «Բալետ Փարաջանով» ժամանակակից ներկայացման առաջնախաղը:
Ներկայացում, որը պարարվեստի լեզվով ներկայացրեց Սերգեյ Փարաջանովի կյանքի ամենադաժան ու գործունեության ամենապտղաբեր տարիները` բանտարկությունը, անազատության մեջ ստեղծագործելու ընթացքն ու աշխարահռչակ ճանաչում վայելող` «Նռան գույնը», «Մոռացված նախնիների ստվերները», «Սատանա», «Աշիկ քերիբ», «Մահը» ֆիլմերի ստեղծման ժամանակահատվածները:
Հայկական, եվրոպական, դասական և ժամանակակից պարաձևերի խառնուրդը և լիբրետոյի հիմքում դրված ազատատենչության համար մղվող պայքարի գաղափարը հանդիսատեսին տեղափոխեցին վառ գույներով լցված փարաջանովյան անծայրածիր աշխարհ: Ներկայացման բեմադրող-ռեժիսոր և խորեոգրաֆ` ՀՀ վաստակավոր արտիստ Արսեն Մեհրաբյան:
Դահլիճում ներկա էին Հայաստանի հանրապետության կրթության, գիտության, մշակույթի և սպորտի նախարարի տեղակալներ Դանիել Դանիելյանն ու Ալֆրեդ Քոչարյանը, եվրոպական պետությունների դեսպաններ, Ֆրանսիայի հանրապետությունից ժամանած մշակութային պատվիրակություն` «Պրելժոկաժ բալետի» գեղարվեստական ղեկավարության և Ֆրանսիական պարլամենտի պատգամավոր Անն Լորանս Պետելի գլխավորությամբ:
Կարդացեք նաև
ՀՀ ԿԳՄՍ նախարարի տեղակալ Դանիել Դանիելյանը հանդես եկավ ողջույնի խոսքով, նշելով. «Այսօր ներկա ենք կարևոր միջպետական մշակութային իրադարձության` «Բալետ Փարաջանով» ներկայացման առաջնախաղին: Փարաջանովյան ժառանգությունը յուրովի և ժամանակին համահունչ ներկայացնելն այս տարվա հոբելյանական միջոցառումների գլխավոր պահանջն է: Արդեն երկրորդ անգամ, Ժողովրդական երաժշտության և պարի ազգային կենտրոնը փարաջանովյան անսահման աշխարհը ներկայացնում է պարային-թատերական ձևաչափով, և շատ կարևոր է շեշտել` միջպետական հայ-ֆրանսիական համագործակցությամբ: Այսօր կտեսնենք ներկայացում, որը ոգեշնչված է Փարաջանովի կյանքից ու ստեղծագործությունից, իր մեջ ամփոփում է Մեծ Վարպետի ամբողջ գունապնակը` կյանքի անձնական դաժան պահերից մինչև ստեղծագործական անսահման վերելքներ: Հուսով ենք, որ այսօր սկիզբ կդրվի նաև այս նախագծի միջազգայնացմանը»:
Ժողովրդական երաժշտության և պարի ազգային կենտրոն
