Արարատի մարզի Արեւշատ գյուղի միջնակարգ դպրոցի դասվար Ռ. Ղ-ն դասաժամի ընթացքում առաջին դասարանի աշակերտների բերաններին կպչուն ժապավեն կապելու համար առայժմ արժանացել է միայն նկատողության:
Դպրոցի տնօրեն Սերինե Գեւորգյանը Aravot.am-ի հետ զրույցում ասաց, որ իրավապահներից է իմացել կատարվածի մասին. «Հանցագործություն չէ, ուղղակի խաղ է կազմակերպել , էդ խաղը, չգիտես ինչու, վերածվել է հանցագործության: Մենք այդ թեմաներով իրավապահների հետ զրուցել ենք, ամեն ինչ նորմալ է, անցել, գնացել է: Ինքը խաղ է կազմակերպել ընդամենը»:
Մեր հարցին, այսինքն նորմալ եք համարում դասաժամին նման խաղերը, ի պատասխան մեր զրուցակիցն ասաց. «Մենք ժողով ենք արել, որոշել ենք իրեն բանավոր նկատողության արժանացնել: Ինքը այս դպրոցում 38 տարվա աշխատանքային ստաժ ունի: Ինքը նաեւ պարզաբանել է, թե ինչու է այդպես վարվել, ասաց՝ աշակերտները աղմկել են, ասել է՝ հիմա ինչ անեմ, սկոտչով ձեր բերանները փակե՞մ, լռություն ենք խաղում: Էդ երկու հոգին առաջ են ընկել, ընդամենը մեկ վայրկյանով փակել ու բացել է: Իհարկե, ընդունելի չեմ համարում, դրա համար արժանացրել եմ նկատողության: Այդ դեպքից որեւէ մեկը չի բողոքել՝ ոչ ծնող, ոչ աշակերտ: Ես սահմանափակվել եմ բանավոր նկատողությամբ»:
Հիշեցնենք, որ ավելի վաղ հայտնել էինք, որ հոկտեմբերի 8-ին Արեւշատի միջնակարգ դպրոցի աշակերտներից մեկի ծնողը՝ Գ. Ա.-ն հանցագործության մասին հաղորդում է ներկայացրել իրավապահներին ուսուցչուհու կազմակերպած «խաղի» վերաբերյալ:
Դեպքի առթիվ նախաձեռնվել է քրեական վարույթ:
Արփինե ՍԻՄՈՆՅԱՆ
