«ՀՀ-ԱՄՆ երկկողմ հարաբերությունները կայուն կմնան: Հարաբերությունների ներկա մակարդակը չի իջնի», – «Հայաստանի նոր հավասարակշռությունը. Ռուսաստան, Արևմուտք և Հարավային Կովկասի ապագան» խորագրով նյույորքյան քննարկման շեշտադրումներն Aravot.am-ի համար ամփոփելիս ասաց միջոցառման կազմակերպիչ, ԱՊՐԻ Արմենիա վերլուծական կենտրոնի՝ ռազմավարության և անվտանգության հարցերով փոխնախագահ Անահիտ Փիլիպպոսյանը:
Փիլիպպոսյանի փոխանցմամբ՝ թեև մասնակից փորձագետները ԱՄՆ նախագահի պաշտոնում Դոնալդ Թրամփի ընտրության դեպքում չեն ակնկալում, որ Հայաստանի և Միացյալ Նահանգների միջև հարաբերությունների ակտիվությունը կարող է նվազել, նրանք կարծում են, որ ամերիկյան հետաքրքրությունները կարող են փոխվել, որի արդյունքում ուշադրությունը Հարավային Կովկասի նկատմամբ կարող է նվազել:
«Թե ինչ կլինի ԱՄՆ-ի վերաբերմունքը Հայաստանի հանդեպ տարածաշրջանային կոնտեքստում մեծապես կապված է, թե ով կլինի Թրամփի կողքին, ովքեր կլինեն նրա խորհրդատուները»,- նշում է Անահիտ Փիլիպպոսյանը:
Aravot.am-ի հարցին՝ արդյո՞ք անդրադարձ կար Երևանի և Մոսկվայի միջև հարաբերությունների ներկա վիճակին, ԱՊՐԻ Արմենիայի ներկայացուցիչը տեղեկացրեց, որ ամերիկացի փորձագետներն ավելի կենտրոնացած էին տարածաշրջանում Չինաստանի աճող հետաքրքրության վրա, քանի որ ամերիկացիները որպես «թիվ մեկ հակառակորդ» Չինաստանին են տեսնում:
Կարդացեք նաև
Հոկտեմբերի 11-ին Նյու Յորքում կայացել է Հայաստանի կիրառական քաղաքականության հետազոտական անկախ վերլուծական կենտրոն ԱՊՐԻ Արմենիայի հրավիրած ՀՀ արտաքին քաղաքականության և անվտանգության թեմայով միջոցառումը:
Քննարկմանը մասնակցում էին մի շարք օտարերկրացի փորձագետներ՝ Ատլանտիկ խորհրդի եվրասիական կենտրոնի ավագ համակարգող, Ուկրաինայում ԱՄՆ նախկին դեսպան Ջոն Հերբսթը, կրոնական ազատությամբ զբաղվող մի շարք կազմակերպությունների ղեկավար-անդամ, միջազգային կրոնական ազատության հարցերով ԱՄՆ հատուկ հանձնարարություններով դեսպան Սեմ Բրաունբեքը, Observor Research Foundation America-ի գործադիր համակարգող Դհրուվա Ջայշանկարը, Թուրքիայի խորհրդարանի նախկին անդամ Գարո Փայլանը, Արտաքին քաղաքականության հետազոտման ինստիտուտի Եվրասիայի հետազոտման ղեկավար, գնդապետ Ռոբերտ Հեմիլթոնը:
Արսեն ԱՅՎԱԶՅԱՆ
