«Ո՞վ պետք է ապահովի Հայաստանի Հանրապետության տարածքում կապուղիների անվտանգությունը: 2020 թվականի նոյեմբերի 9-ի եռակողմ հայտարարության 9-րդ կետին հղում անելով՝ ՌԴ-ի եւ Ադրբեջանի կողմից փորձ է արվում ասել, թե 9-րդ կետով անվտանգությունը արտապատվիրակված է ՌԴ-ին: Չեմ հոգնի կրկնել, եւ մեջբերել նոյեմբերի 9-ի հայտարարության 9-րդ կետը՝ ապաշրջափակվում են տարածաշրջանում բոլոր տնտեսական ու տրանսպորտային կապերը: Նաեւ Ադրբեջանից շատ հաճախ փորձ է արվում տպավորություն ստեղծել, թե 2020 թվականի նոյեմբերի 9-ի եռակողմ հայտարարության 9-րդ կետը Նախիջեւանի եւ Ադրբեջանի Արեւմտյան շրջանների կապի մասին է, այդպես չէ»,- «Քաղաքացիական պայմանագիր» կուսակցության և Կոնրադ Ադենաուեր հիմնադրամի կողմից կազմակերպված «Խաղաղության խաչմերուկ. միավորելով անվտանգությունն ու ժողովրդավարությունը» թեմայով համաժողովի ժամանակ այսօր ասաց ՀՀ վարչապետ Նիկոլ Փաշինյանը:
Նա ընդգծեց, որ ՀՀ-ն երաշխավորում է Ադրբեջանի արեւմտյան շրջանների եւ Նախիջեւանի միջեւ տրանսպորտային ոչ միայն անվտանգությունը, այլեւ դրա կազմակերպումը. «ՀՀ-ն երաշխավորում է անվտանգությունն ու կազմակերպումը: Ինչպե՞ս ՀՀ-ն կարող է երաշխավորել անվտանգությունը, եթե անվտանգությունն ապահովում է երրորդ երկիր… հիմա կարդամ շարունակությունը՝ տրանսպորտային հաղորդակցության նկատմամբ վերահսկողություն իրականացնում են ՌԴ ԱԴԾ սահմանապահ ծառայության մարմինները: Թե գրածը ինչ է նշանակում, պարզաբանված է ՌԴ նախագահի 2020 թվականի դեկտեմբերի 10-ի հրամանագրի մեջ, որը վերաբերում է մեր տարածաշրջանին: Սա նշանակում է, որ ՌԴ ներկայացուցիչներին կարող է վերապահվել մոնիտորինգի ինչ-որ գործառույթ՝ տեսնելու համար, թե ՀՀ-ն ինչքանով է կատարում իր պարտավորությունները: Նոյեմբերի 9-ի հայտարարության որեւէ կետում չկա, որ ՀՀ ինքնիշխան որեւէ իրավազորություն որեւէ կերպ սահմանափակվելու է, որ ՀՀ մեկ քառակուսի մետր տարածքի վրա որեւէ ուրիշ երկիր սահմանելու է որոշակի վերահսկողություն: Նման բան չկա ու չի կարող լինել»:
Վարչապետը անդրադարձավ եռակողմ հայտարարության մյուս կետերին ու հարցադրումներ առաջ քաշեց. «Իսկ ո՞ւր է հիմա Լաչինի միջանցքը: Ո՞ւր են հիմա խաղաղապահները, որոնք եռակողմ հայտարարության համաձայն պետք է տեղակայված լինեին ԼՂ-ում: Իսկ որտեղ է եռակողմ հայտարարության 7-րդ կետը, որտեղ ասվում է՝ ներքին տեղահանված անձինք ու փախստականները վերադառնում են ԼՂ տարածք ու հարակից շրջաններ ՄԱԿ-ի փախստականների հարցով գերագույն հանձնակատարի գրասենյակի վերահսկողության ներքո: Ինչու այդ ամենը տեղի չի ունենում, էլ չեմ ասում իրականացվող ռազմագերիների, պատանդների այլ պահվող անձանց, զոհվածների մարմինների փոխանակում: Ադրբեջանը շատ թմբկահարում է անհետ կորածների խնդիրը, բայց այսօր ՀՀ-ն 1000 անհետ կորած մարդու ցուցակ ունի, որոնց ճակատագիրը պետք է պարզաբանվի, գերեւարված անձինք ունենք 2020 թվականից»։
Կարդացեք նաև
Արփինե ՍԻՄՈՆՅԱՆ
