«Իրազեկ քաղաքացիների միավորումն» իր մտահոգությունն է հայտնում Ջոն Կիրակոսյանի անվան դպրոցում հոկտեմբերի 10-ին տեղի ունեցած միջադեպի կապակցությամբ և պահանջում Ազգային անվտանգության ծառայությունից իրականացնել ծառայողական քննություն և պարզել դեպքի բոլոր հանգամանքները:
Հիշեցնենք, որ հոկտեմբերի 10-ին ԱԱԾ աշխատակիցները Երևանի Ջոն Կիրակոսյանի անվան թիվ 20 դպրոցից բերման էին ենթարկել դպրոցի ուսուցիչներից մեկին, որը մեղադրվում է Քրեական օրենսգրքի 201-րդ հոդվածի 3-րդ մասի 1-ին և 3-րդ կետերով՝ «անառակաբարո արարք կատարելը […] վերընթաց ազգականի կամ այն անձի կողմից, որի վրա դրված է երեխայի դաստիարակության, խնամքի կամ բուժման պարտականություն, […] հանցավորին դիմադրություն ցույց տալու կամ իր նկատմամբ կատարվող արարքի բնույթը գիտակցելու հնարավորությունից զրկված կամ հոգեկան առողջության խնդիրներ ունեցող անձի նկատմամբ»:
Սակայն ԱԱԾ գործողությունները՝ ներառյալ ուսուցչի նկատմամբ ֆիզիկական ուժ գործադրելը, կատարվել էր դպրոցի աշակերտների աչքի առաջ, ինչն առաջացրել էր հանրության դժգոհությունը:
Կարդացեք նաև
Ստացված ահազանգերի կապակցությամբ «Իրազեկ քաղաքացիների միավորումը» գրավոր դիմել է ԱԱԾ՝ պահանջելով իրականացնել ծառայողական քննություն և պարզել, թե արդյո՞ք իրավաչափ էր ուսուցչի նկատմամբ ֆիզիկական ուժի գործադրումը և արդյո՞ք կատարվել էին պատշաճ գործողություններ` աշակերտներին չվախեցնելու համար:
«Իրազեկ քաղաքացիների միավորում»
