«Մեր գնահատմամբ, այս պահին արդեն 1100 քառակուսի կիլոմետրից ավելի տարածք ենք զիջել Ադրբեջանին, թեեւ Նիկոլն ասում է՝ 260 քառակուսի կիլոմետր։ Եվս 600-700 քառակուսի կիլոմետր է պատրաստվում զիջել՝ չհաշված միջանցքը»,-այսօր «Միասին» այլընտրանքային հասարակական-քաղաքական շարժման կազմակերպած՝ «Googlemaps-ի կեղծարարությամբ ՀՀ տարածքները «դարձան» Ադրբեջան» խորագրով կլոր սեղանի ժամանակ հայտարարեց հիմնական զեկուցող, «Ազատություն» կուսակցության նախագահ Հրանտ Բագրատյանը։
Կարդացեք նաև
Նա ներկայացնում էր 1987 թվականին Հայաստանի և Ադրբեջանի միջև ստորագրված եռակողմ արձանագրությունը սահմանազատման-սահմանագծման մասին։ Հրանտ Բագրատյանը հայտարարեց, որ 1987 թվականի քարտեզները՝ երեք օրինակ, «Գիպրոզեմից» բռնագրավել է ՀՀ փոխվարչապետ Մհեր Գրիգորյանը եւ տարակուսեց՝ հարցեր են ծագում՝ ինչո՞ւ, ինչի՞ դիմաց․ «Մենք տեսնում ենք, որ երկիր է վաճառվում, հող է վաճառվում՝ մեղքը գցելով մեկ նախկինների վրա, մեկ Մոսկվայի, բայց հանցագործությունը շատ կոնկրետ է, գողը շատ կոնկրետ է»։
«Հայկական կողմից չկա ստորագրված որեւէ փաստաթուղթ, որ Տիգրանաշենն անկլավ է»,- հայտարարեց ՀԴԿ նախագահ Արամ Սարգսյանը՝ հավելելով, որ կառավարությունից ոչ ոք դեռ չի հակադարձել իրենց այս պնդումներին։
«Ազգային անվտանգություն» կուսակցության նախագահ Գառնիկ Իսագուլյանն էլ ուշադրություն հրավիրեց այն հանգամանքին, որ բոլոր փաստաթղթերը, որոնք ուղարկվում են ՍԴ, փոխվարչապետ Մհեր Գրիգորյանի ստորագրությամբ են։
Նելլի ԳՐԻԳՈՐՅԱՆ
