Հակակոռուպցիոն դատարանում, դատավոր Սարգիս Պետրոսյանի նախագահությամբ, ընթանում են ՀՀ երկրորդ նախագահ Ռոբերտ Քոչարյանի և մյուսների գործով նիստը։
Հիշեցնենք, որ այս գործով, բացի Ռոբերտ Քոչարյանից, մեղադրյալներ են նաև պաշտպանության նախկին նախարար Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը և նախկին փոխվարչապետ Արմեն Գևորգյանը։
Ռոբերտ Քոչարյանը դատարանին խնդրեց պարզաբանել, թե ինքը որ հոդվածով է որպես մեղադրյալ ներգրավված: Քոչարյանի պաշտպան Արամ Օրբելյանն էլ դիրքորոշում հայտնեց, որ իր պաշտպանյալը չի կարող որպես մեղադրյալ ներկա գտնվել, իսկ ինքը՝ որպես պաշտպան:
Նիստը նախագահողը հետաքրքրվեց՝ բա ինչու են ներկայացել: Ինչին ի պատասխան՝ Արամ Օրբելյանն ասաց, որ հարգել են դատարանի ծանուցագիրը, եկել են դատարան ՝ հասկանան:
Կարդացեք նաև
Արամ Օրբելյանը նկատեց, որ Սահմանադրական դատարանի որոշումը կայացնելու պահից՝ հոդվածը, որով ի սկզբանե իր պաշտպանյալին առաջադրվել էր մեղադրանքը, ճանաչվել է Սահմանադրությանը հակասող և ուժը կորցրած։
Ռոբերտ Քոչարյանն էլ հավելեց, որ դատարան է եկել բարի կամք դրսեւորելով. «Ես կարող էի ընդհանրապես չգալ: Եկել եմ ցույց տալու, որ չմտածեն, թե ես վախեցել եմ դատարան գալուց: Ի վերջո, քանի տարի դատարանների հետ շփվում եմ ու կարող էի գալ, բայց ոչ թե նստել այստեղ, այլ՝ այնտեղ (նկատի ունի նիստերի դահլիճում, ոչ մեղադրյալի աթոռին): Այս քրեական հետապնդումը սկսվել է շատ լուրջ խախտումներով, ուղղակի բռնաբարվում է օրենքը »:
Ռոբերտ Քոչարյանն իր խոսքն ավարտելուց հետո մեղադրյալի աթոռից վեր կացավ ու գնաց, նստեց նիստերի դահլիճում՝ նիստի մասնակիցների համար նախատեսված նստարանին:
Հիշեցնենք նաեւ, որ առաջին երկու ատյանները դադարեցրել էին ամբաստանյալների նկատմամբ քրեական հետապնդումը, իսկ Վճռաբեկ դատարանը գործն ուղարկել է Հակակոռուպցիոն դատարան՝ կրկնակի քննության՝ հիմնավորելով, որ Քրեական օրենսգրքի դրույթները սխալ են մեկնաբանվել, և մեծ թվով տուժածների լույսի ներքո, մեղավորները պետք է պատժվեն:
Մեղադրող դատախազն էլ նկատեց, որ Սահմանադրական դատարանն արձանագրել է, որ որեւէ նորմի ՝ Սահմանադրությանը հակասող կամ անվավեր ճանաչվելու դեպքում որեւէ կերպ չի կարող համարվել քրեական վարույթը բացառող հանգամանք:
Ըստ դատախազի՝ պնդումը, որ Սահմանադրական դատարանի որոշումից հետո նախկին ամբաստանյալները չունեն մեղադրյալի կարգավիճակ, չի բխում այդ որոշումներից: Քրեական հետապնդումը նրանց նկատմամբ դադարեցված չէ: Հետապնդումը դադարեցնելու մասին որոշումը Վճռաբեկ դատարանի կողմից բեկանվել է:
Դատախազն ասաց, որ հիմա պետք է նիստը նախագահողի ինքնաբացարկի հարցը քննարկվի: Արձագանքեց Արմեն Գեւորգյանի պաշտպան Լուսինե Սահակյանը՝ հարցնելով հիմա մենք ինչով ենք զբաղված. «Ուզում եմ հասկանալ՝ ով է ձեզ բացարկ ներկայացնում, ով… ինչու եք այսքան մարդու ծանուցել, ինչ ենք այստեղ անում, ով է ձեզ բացարկ հայտնել, այսքանը հասկանանք, հետո հասկանանք՝ ինչ գործողություններ ենք անելու»:
Նիստը նախագահողն էլ արձագանքեց՝ եթե գտնում եք, անելիք չունեք այստեղ, կարող եք գնալ նիստերի դահլիճից: Նա հավելեց, որ ինքնաբացարկի մասով հարցը կուղղի պաշտպաններին, կուզեն, կներկայացնեն, չեն ուզի՝ չեն ներկայացնի:
Այս գործով բոլոր մեղադրյալների պաշտպանները միակարծիք էին, որ եթե չկա հոդվածը, չկա մեղադրանք ու չկա քրեական հետապնդում:
Արփինե ՍԻՄՈՆՅԱՆ
