Նոյեմբերին Ադրբեջանում կայանալիք ՄԱԿ-ի Կլիմայի փոփոխության համաժողովին (COP29) ընդառաջ աշխարհի տարբեր երկրներում մեկնարկել են ցույցեր եւ միջոցառումներ՝ Ադրբեջանում ապօրինաբար պահվող հայ ռազմագերիների և պատանդների անհապաղ ազատ արձակման պահանջով։
Այսօր նման միջոցառումներ իրականացվեցին նաեւ ՄԱԿ-ի հայաստանյան գրասենյակի, ՀՀ ԱԳՆ, ՀՀ-ում Ռուսաստանի Դաշնության, Ֆրանսիական Հանրապետության և Ամերիկայի Միացյալ Նահանգների դեսպանատների առաջ, որոնց ընթացքում նույն պահանջով նամակներ փոխանցվեցին հասցեատերերին։
Կարդացեք նաև
«Պետք է Հայաստանից տասնյակ հազարավոր դիմումներ ու պահանջներ գնան ինչպես COP29-ի կազմակերպիչներին, այնպես էլ բոլոր նրանց, ովքեր ուզում են հայկական արյան հետքերով գնալ եւ մասնակցել այդ միջոցառմանը»,-ասաց ՀՀ մարդու իրավունքների նախկին պաշտպան Լարիսա Ալավերդյանը
«Հայաստանի Հանրապետությունում չպետք է լինի գեթ մեկ անձ, մեկ կազմակերպություն, մեկ կուսակցություն, որը այս ընթացքում չդիմի այդ հասցեատերերին: Սա խիստ քաղաքական հարցերի հետ կապ չունի: Ամեն մեկը պետք է իրեն հարց տա եւ պատասխանի՝ ինչու չի դիմում անձամբ ինքը, խմբերով, լրագրողները եւ մնացածը: Եթե գտնվի գեթ մեկ հասարակական կազմակերպություն, որ չդիմի, նա հանցակից է դառնում այն բոլոր հանցագործություններին, որը գործել է եւ շարունակում է գործել Ադրբեջանը»,-ասաց տիկին Ալավերդյանը: Նա փաստեց, որ ոչ միայն քանդել, ավերել են Արցախի մշակութային, կրոնական ժառանգությունը, այլեւ Ստեփանակերտը:
Գոհար ՀԱԿՈԲՅԱՆ
