Երեկ «Արթկոսմեդ» էսթետիկ վիրաբուժական կլինիկայի հիմնադիր տնօրեն Արթուր Սարգսյանը ՖԲ էջով ցավակցություն էր հայտնել իր մահացած պացիենտի՝ 56-ամյա կնոջ հարազատներին: Բուժառուի մահը վրա է հասել սրտամկանի սուր ինֆարկտից։
Արթուր Սարգսյանը քրեական սկանդալներով հայտնի թիվ 19 պոլիկլինիկայի տնօրեն Սամվել Սարգսյանի որդին է։ «Առողջության իրավունք» իրավապաշտպան հասարակական կազմակերպության հիմնադիր Ծաղիկ Վարդանյանը կարծում է, որ չի կարելի այսօր, երբ մարդուն նոր են թաղում, մահվան պատճառի մասին եզրակացություններ անել։ «Դա հերթական սխալն է։ Պետք է դատաբժշկական փորձաքննություն լինի, մասնագիտական եզրակացություն, որի հիման վրա հայտարարվի մահվան պատճառը»,- ասում է նա՝ հիշեցնելով, որ այս հաստատությունում սա արդեն մահվան երկրորդ դեպքն է։ Առաջինը տեղի էր ունեցել 2023-ին` 31 տարեկան երիտասարդ կին էր մահացողը։ Այս գործով վարույթը դեռ ընթանում է, դատաբժշկական եզրակացություն չկա։
Ըստ Ծաղիկ Վարդանյանի՝ բուժհաստատությունը ստանում է լիցենզիա, սակայն հետո ոչ մի վերահսկողություն չի իրականացվում։ «Տեսչական մարմինը կարող է մտնել, ուսումնասիրություններ կատարել, բայց զուտ գրագրության առումով, ասենք` կստուգի, թե արդյո՞ք հիվանդության պատմագրերը ճիշտ են գրված, թե ոչ։ Սակայն կլինիկական դեպքերում բուժօգնության որակը չի վերահսկվում, ընթացակարգեր չկան։ Եթե դու մի քիչ բարեխիղճ բժիշկ ես, քո անձնական նախաձեռնությամբ անում ես այնպես, որ հիվանդդ չմահանա»։
56 տարեկան կինը գնացել է գեղեցկանալու, արդյունքում երեկ նրան հուղարկավորեցին։
Կարդացեք նաև
Առողջապահության նախարարությունն ունեցել է վերահսկողական գործառույթ մինչեւ 2017-ը, այսօր չունի: Կարող է իրականացնել մոնիթորինգ, տեսնել խնդիրը եւ տեսչական մարմնին ահազանգել:
Սյուզան ՍԻՄՈՆՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
