Ռուսական պետական «ՌԻԱ Նովոստի» գործակալությունը Մոսկվայում կայացած ԱՊՀ ղեկավարների խորհրդի նիստից Նիկոլ Փաշինյանի մասնակցությամբ խիստ անհաջող և նույնիսկ անպարկեշտ, պաշտոնական էթիկետին չհամապատասխանող կադրեր է տարածել։ Նիկոլ Փաշինյանը լուսանկարվել է այնպիսի տեսանկյունից ասես խոնարհված է Ադրբեջանի դրոշի առջև, իսկ մյուս լուսանկարում Ալիևի հայացքի ներքո Փաշինյանը կրկին ադրբեջանական դրոշի առջև ուղղում է տաբատը: Իշխանական «Բաղրամյան 26» թելեգրամյան ալիքը տարածել էր այդ լուսանկարները՝ գրառմամբ հաշիվ պահանջելով ռուսական պետական լրատվամիջոցի խմբագրից` միտումնավոր նման անհարմար ռակուրսից արված լուսանկարներ տարածելու համար։
«Վերելք» տեղեկատվական-վերլուծական կենտրոնի քաղաքական մեկնաբան Հայկ Խալաթյանը նկատեց, որ նախ՝ ՀՀ վարչապետն ինքը պետք է շատ զգույշ լինի, հասկանա՝ որտեղ է գտնվում, կամ իր օգնականները պետք է հուշեն, որ չարժե Ադրբեջանի դրոշի մոտ նման դիրք զբաղեցնել, եթե նույնիսկ դա հանկարծակի է եղել.
«Երկրորդ՝ դա խոսում է այն մասին, որ որևէ հարգանք չկա ՀՀ ղեկավարի հանդեպ ՌԴ իշխանությունների կողմից, որովհետև չգիտես՝ ինչու, այլ երկրների ղեկավարների հետ այդպիսի կիքսեր չեն լինում: Այսօր նույնիսկ այլ տեսանյութեր տեսա՝ սուրճ խմելիս և այլն, և հասկանալի է, որ հաստատ դա լրագրողները չեն նկարել և հրապարակել: Հենց դա է, որ եթե նորմալ հարաբերություններ լինեին, «ՌԻԱ Նովոստին» չէր համարձակվի այդպիսի նկարներ հրապարակել, կամ եթե նույնիսկ սխալմամբ հրապարակեր, շատ արագ կհեռացներ (այդ նկարներն ավելի ուշ հեռացվեցին.-խմբ): Մոսկվայի համար մեկ է՝ ՀՀ վարչապետը կամ նրա հետ կապված լրատվամիջոցները ոնց կարձագանքեն: Ես չեմ բացառում, որ պատահմամբ է եղել, բայց փաստացի վիրավորական է ՀՀ իշխանությունների նկատմամբ»:
Ամփոփելով Փաշինյանի մոսկովյան այցը, նա ուշադրություն հրավիրեց այն փաստի վրա, որ դատելով ՌԴ ԱԳՆ վերջին երկու բրիֆինգներից, թե տոնայնությունը ինչպես էր փոխվել, երբ խոսում էին Հայաստանի մասին, դա նշանակում էր, որ ռուսական կողմը որոշակի սպասելիքներ ուներ, որ կարող են որոշ հարցեր լուծվել:
Կարդացեք նաև
Ռազմիկ ՄԱՐՏԻՐՈՍՅԱՆ
Հոդվածն ամբողջությամբ՝ «168 ժամ» շաբաթաթերթի այս համարում
