Հոկտեմբերի 9-ին Թուրքիան ծովային ճանապարհով կտարհանի իր քաղաքացիներին, որոնք դիմել են Լիբանանից հեռանալու խնդրանքով, ինչպես փոխանցում է Reuters-ը, այս մասին հայտնել է Թուրքիայի արտաքին գործերի նախարարությունը։
Հայտարարության մեջ նշվում է, որ հոկտեմբերի 8-ին Բեյրութ կմեկնի թուրքական երկու ռազմանավ, որոնք մինչև 2000 ուղևոր կարող են տեղափոխել։ Ներքին գործերի նախարարությունից հավելել են, որ տարհանման գործընթացը անհրաժեշտության դեպքում կտևի մի քանի օր։
Անցյալ շաբաթ առևտրային լաստանավով Լիբանանից Թուրքիա են ժամանել տարբեր ազգությունների հարյուրավոր մարդիկ։ Թուրքիան հայտարարել էր, որ համագործակցում է շուրջ 20 երկրի հետ՝ երկրի տարածքով օտարերկրյա քաղաքացիների հնարավոր տարհանումը նախապատրաստելու ուղղությամբ:
Հիշեցնենք՝ սեպտեմբերի 23-ին Իսրայելը հայտարարեց Լիբանանում «Հյուսիսի նետեր» «կանխարգելիչ հարձակողական գործողություն» սկսելու մասին։ Սեպտեմբերի 28-ին հայտնի դարձավ, որ Իսրայելն իր ավիահարվածով սպանել է Հըզբոլլահի առաջնորդին։
Կարդացեք նաև
Հոկտեմբերի 1-ի գիշերը Իսրայելի պաշտպանության բանակը հայտարարեց հարավային Լիբանանի սահմանային գոտում Հըզբոլլահի դեմ «սահմանափակ, տեղայնացված և նպատակային հարձակումներ» սկսելու մասին:
Թուրքիայի նախագահ Ռեջեփ Թայիփ Էրդողանն ավելի վաղ հայտարարել էր, թե Գազայի հատվածում և Լիբանանում իր քաղաքականության հետևանքով Իսրայելի վարչապետ Բենիամին Նեթանյահուին կկանգնեցնեն այնպես, ինչպես Ադոլֆ Հիտլերին կանգնեցրին։
