Մեր ժամանակներում դասական արվեստը զուգահեռվում է սիմֆո-ջազ, սիմֆո-փոփ, սիֆո-ռոք և այլ ուղղությունների հետ:
Օրերս «Արամ Խաչատրյան» համերգասրահում կայացավ Հովհաննես Թումանյանի «Մի կաթիլ մեղրը» սիմֆո-հեքիաթի պրեմիերան: Երաժշտության և երգերի խոսքերի հեղինակը Նարեկ Դուրյանն է, համերգը ղեկավարեց Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը:
Մասնակցությամբ Երևանի պետական կամերային երգչախմբի (խմբավար՝ Քրիստինա Ոսկանյան) և Ձայնի պահպանման վոկալ-երգչախմբային մասնագիտական դպրոցի մենակատարների (խմբավար՝ Էմմա Առաքելյան):
Կարդացեք նաև
Սիմֆո-հեքիաթի հեղինակ և պատմիչ Նարեկ Դուրյանի փոխանցմամբ՝ իր կապն Ազգային ֆիլհարմոնիկի հետ, իհարկե, շատ վաղուցվա պատմություն ունի հոր՝ Օհան Դուրյանի, շնորհիվ. «Իսկ «Մի կաթիլ մեղրի» շուրջ համագործակցությունը սկսվեց, երբ ինձ առաջարկեցին Ֆիլհարմոնիկի հետ հանդես գալ Պրոկոֆևի «Պետյան և գայլ» սիմֆոնիկ հեքիաթում՝ պատմիչի դերում: Այդ ժամանակ մեզ մոտ միտք հղացավ երեխաների համար երաժշտական հեքիաթների շարան անել, բայց ոչ միայն երեխաների, նաև մեծերի: Երաժշտական ստեղծագործությունների հետաքրքրությունը նա է, որ երաժշտության շնորհիվ մեծերին էլ ես բերում դեպի դահլիճ», – ասում է Դուրյանը: Նա հավելեց, որ որոշում կայացվեց սկսել Հովհաննես Թումանյանի «Մի կաթիլ մեղրից», որն իր համար հանճարեղ գործ է. «Ես գտնում եմ, որ անարդար է, որ այս գործը համաշխարհային մակարդակով ճանաչում չունի: Դա շատ հզոր, փիլիսոփայական ստեղծագործություն է: Ժամանակին Փարիզում արել էի մի կաթիլ մեղրը, մեկ-երկու երգ էի գրել այդ բեմականացման համար, որոշեցի այդ ամենը զարգացնել:
Ֆիլհարմոնիկի տնօրինությունն իր համաձայնությունը տվեց՝ գեղարվեստական ղեկավարը նույնպես: Թե նվագախմբի, թե երգչախմբի հետ անմիջապես ստացվեց մեր կոնտակտը, առհասարակ, բախտս բերել է, որ լավ մարդիկ հավաքվեցին այս գործի շուրջ»,- եզրափակեց արտիստը:
Քանի որ արվեստագետը հաղորդեց, որ որոշել են «երաժշտական հեքիաթների շարան անել», անհամբերությամբ սպասում ենք հաջորդ նախագծերին:
Սամվել ԴԱՆԻԵԼՅԱՆ
