Վանաձորի նախկին քաղաքապետ Մամիկոն Ասլանյանն այսօր դատարանում հայտնեց, որ ցուցմունք տալու ցանկություն ունի:
Դատարանն առաջարկեց ցուցմունք տալ մեղադրանքի ու գործի հանգամանքների վերաբերյալ:
«Երկու տարի, 9 ամիս քննության ընթացքում այդպես էլ պարզ չդարձավ մեղադրանքի էությունը, բացի դեկլարատիվ քննչական տերմիններից ինչում է ինձ մեղադրում մեղադրող կողմը: Այս գործի շրջանակում այդպես էլ չհասկացա՝ որոնք էին իմ թվացյալ հանցավոր գործողությունները, որոնք կարող էին հանգեցնել սկզբում քրեական վարույթի, հետագայում ինձ մեղադրանք առաջադրելուն, կալանավորելուն, մեղադրանքը մի քանի անգամ փոփոխելուն»,- ասաց Մամիկոն Ասլանյանը :
Հիշեցնենք, որ Ասլանյանին առաջադրված մեղադրանքի համաձայն՝ 2016-2021թթ. ընթացքում զբաղեցնելով հիշյալ պաշտոնը, չարաշահել է իր պաշտոնեական լիազորությունները, դիտավորությամբ ակնհայտորեն դուրս է եկել իր լիազորությունների շրջանակից, կատարել պաշտոնեական կեղծիք՝ պետության և համայնքի իրավունքներին ու օրինական շահերին անզգուշությամբ պատճառելով ծանր հետևանքներ առաջացնող էական վնաս:
Կարդացեք նաև
« Ինձ առաջադրված մեղադրանքի առնչությունը ինձ հետ միայն այն մասով է, որ այդ ժամանակահատվածում եղել եմ Վանաձոր համայնքի ղեկավար: Օրենսդիրը, երբ համայնքի ղեկավարի համար սահմանում է ցենզ, կրիտերիաներ, որով կարող է դառնալ ղեկավար, այնտեղ նշված չէ, որ համայնքի ղեկավարը պետք է ունենա բարձրագույն, էլ չեմ ասում մասնագիտական կրթություն: Հետեւաբար, համայնքի ղեկավարին վերագրել այնպիսի հանցագործություններ, որոնք կոնկրետ բխում են նեղ մասնագիտական գործառույթներ իմանալուց, հմտություններ ունենալուց, համարեք, որ ես որպես համայնքի ղեկավար չունեմ կրթություն»,- շարունակեց Ասլանյանը:
Ըստ նրա՝ այսօր ինքը կանգնած է դատարանի առջեւ ու պատասխան է տալիս այնպիսի գործողությունների համար, որոնք իրեն չպետք է վերաբերեն. «Ինձ կարող են վերաբերել այնպիսի գործողություններ, որոնք կբխեն իմ գործողություններից կամ անգործությունից, կլինեն դիտավորության հետեւանք:
Հողերի օտարման, նպատակային կամ գործառնական նշանակությունը փոխելը համայնքի ղեկավարի գործառույթներ են մեծ առումով: Եթե նույնիսկ «ընդունենք», որ որեւէ դրվագում կա որեւէ խախտում, այդ բոլորը վարչական իրավահարաբերություններով կարգավորվող գործեր են, որոնք ամենեւին քրեական վարույթի շրջանակում երբեւէ չպետք է քննվեին»:
Պարոն Ասլանյանը նաեւ ասաց, որ նոր է իմացել, որ դատախազությունը տարբեր դրվագներով վարչական դատարան է դիմել այս նույն իր կողմից ընդունված վարչական ակտերի վիճարկման համար. « Բանից պարզվում է, որ քրեական գործով անցնում եմ մեղադրյալ, բայց այդ նույն գործերով Վարչական դատարան է դիմում, որ պարզաբանվի: Սա իրավական կազուսի ժանրից է»:
Արփինե ՍԻՄՈՆՅԱՆ
