«Երեկ՝ լսելով հիմնական զեկուցողին, չտեսանք փաստարկված հիմնավորում, թե ինչու են պետք այս հարցերի պատասխանները, եթե իրենք ունեն նման հարցեր, ստանալ հենց քննիչ հանձնաժողովի ստեղծմամբ։ Հիմնավորումները մեզ համար բավականաչափ փաստարկված չէին։ Դրա համար ՔՊ խմբակցությունը դեմ է քվեարկելու այս հարցին»,- այսօր խորհրդարանում հայտարարեց իշխող «Քաղաքացիական պայմանագիր» խմբակցության ղեկավար Հայկ Կոնջորյանը։
Հայտարարությունը հնչեց «Բռնի տեղահանված և ՀՀ տեղափոխված Արցախի հանրապետության ժողովրդի կենսագործունեության պայմաններն ուսումնասիրելու նպատակով ԱԺ քննիչ հանձնաժողովի» անդամների թիվը սահմանելու մասին որոշման նախագծի քվեարկությունից առաջ։ Նախաձեռնությունը ԱԺ «Հայաստան» եւ «Պատիվ ունեմ» խմբակցություններինն էր։
Հայկ Կոնջորյանը նաեւ նկատեց՝ ՀՀ կառավարությունը եւ կառավարող խմբակցությունը բազմաթիվ ծրագրեր է իրականացրել եւ իրականացնում Արցախից տեղահանված մեր հայրենակիցների սոցիալական, բնակարանային ապահովության հարցերը լուծելու համար, խորհրդարանական ընդդիմությունը՝ իր պատգամավորական լիազորությունների շրջանակներում օժտված է բոլոր ձեւաչափերով աշխատել իշխանության հետ, ստանալ իրենց հուզող հարցերի պատասխանները։
Արձագանքեց Արծվիկ Մինասյանը՝ հայտարարելով․ «Այն, ինչ լսեցինք ՔՊ մեծամասնության կողմից, ընդամենը փորձ է հրաժարվելու սահմանադրական պարտականությունների կատարումից։ Ես ուզում եմ հիշեցնել, որ քննիչ հանձնաժողովի կարեւորագույն առաքելություններից մեկը հանդիսանում է խորհրդարանի վերահսկողական գործունեությունը»։
Կարդացեք նաև
Արծվիկ Մինասյանը հայտնեց, որ սփյուռքից եւ միջազգային կազմակերպություններից հսկայական միջոցներ են հատկացվել Արցախի ժողովրդի կենսապայմանների բարելավման համար․ «Եթե չեք մասնակցելու՝ նշանակում է, որ դուք տորպեդահարում եք նախագիծը եւ հրաժարվում ենք ձեր սահմանադրական պարտականություններից»։
Իսկ լրագրողների հետ զրույցում, Արծվիկ Մինասյանը հայտարարեց. «ՔՊ-ն քիչ առաջ կրկին դավաճանեց Արցախին»։
Նախագծին դեմ էին 56 պատգամավորներ, կողմ քվեարկեցին ընդդիմադիր 28 պատգամավորները. այն չընդունվեց։
Մանրամասները՝ տեսանյութում
Նելլի ԳՐԻԳՈՐՅԱՆ
