Արցախի Մարդու իրավունքների պաշտպան Գեղամ Ստեփանյանը տեսաուղերձ է հղել Ժնևում Քրիստոնեական համերաշխության կազմակերպության կողմից կազմակերպված «Մարդու իրավունքներն Ադրբեջանում. հայ կալանավորների ճակատագիրը» խորագրով քննարկման մասնակիցներին։
Ստեփանյանը բացատրել է հայերի պատանդառման համատեքստը, հիշեցրել՝ Արցախի վրա ադրբեջանական վերջին ագրեսիան հանգեցրեց Արցախի ժողովրդի՝ 120.000 մարդու բռնի տեղահանման։
Արցախցի պաշտոնյան կարևոր է համարել տեղահանված անձանց սոցիալ-տնտեսական խնդիրները հասցեագրելու համար միջազգային հանրության կողմից Հայաստանին ակտիվ աջակցությունը։ Հայաստանի ռեսուրսները բավարար չեն, ասել է նա։
Լեռնային Ղարաբաղում համակարգված կերպով ջնջվում է հայկական հետքը, ահազանգել է Արցախի ՄԻՊ-ը։ Նա մատնանշել է Քարին տակ համայնքի օրինակը։ Այն ամբողջապես ավերվել է։
Կարդացեք նաև
Օմբուդսմենն անդրադարձել է նաև արցախցիների անվտանգ, արժանապատիվ և հավաքական վերադարձի հարցին, ընդգծել՝ այս թեման ուղղակի կերպով կապված է ինքնորոշման իրավունքի հետ։
Գեղամ Ստեփանյանի խոսքով՝ հայ պատանդներին ազատելու համար լոկ իրավական միջոցները բավարար չեն և պետք է միջազգային հզոր ճնշում գործադրել Ադրբեջանի վրա՝ այս նպատակին հասնելու համար։
Արսեն ԱՅՎԱԶՅԱՆ
