«Ի՞նչ փաստաթուղթ ՍԴ-ն ճանաչեց Սահմանադրությանը չհակասող, մի փաստաթուղթ, որն ական է ՀՀ տակ։ Փաստաթուղթ, որն Ադրբեջանին հնարավորություն կտա բզկտել մեր սահմանները՝ Հայաստանի դեմ նոր հարձակում սկսելու»,- ԱԺ հայտարարությունների ժամին ասաց «Հայաստան» խմբակցության պատգամավոր Արթուր Խաչատրյանը։
Նա ասաց, որ հարց է տալիս ՍԴ անդամներին՝ ի՞նչ հիմնարար սկզբունքներով է իրականացվելու սահմանազատումը։ «Կասեք՝ Ալմա-Աթայի հռչակագրով։ Կասե՞ք՝ այդ հռչակագրում որ սահմաններն են հիշատակված։ Հռչակագրում սահմաններ նկարագրված չեն, որեւէ քարտեզի վրա հղում արված չէ։ Այսինքն՝ ո՞րն է սահմանազատման ելակետը։ Իշխանություններն ասում են՝ 70-ական թվականների քարտեզը, բայց այդ փաստաթղթում դա գրված չէ, որովհետեւ Ադրբեջանը դեմ է խոսել դրան։ Նշվում է, որ այդ ելակետային քարտեզը կարող է օպտիմալացվել։ Հասկանում եք, չէ, որ օպտիմալացման արդյունքում սահմանը կարող է փոփոխվել , ո՞վ պիտի հաստատի այդ նոր տարածքը։ ՍԴ-ին այդ հարցը չի հետաքրքրում»,- ասաց Արթուր Խաչատրյանը։
Նա նշեց, որ խնդրահարույց է նաեւ հատվածական սահմանազատման մասին հիշատակումը, օրինակ, ադրբեջանցիները կարող են վերցնել ու սահմանազատել Նախիջեւանի եւ Արարատի մարզի միջեւ խիստ որոշակի մի հատված։ «Իսկ երբ է սահմանազատվելու Ճամբարակի որոշակի հատվածը, տարիներ հետո, կամ կարող է ընդհանրապես չսահմանազատվել»,- ասաց նա։
Արթուր Խաչատրյանը հավելեց․ «Այս իշխանությունների նպատակը խնդիրը լուծելը չէ, նրանց նպատակն է ունենալ մի թուղթ եւ ասել՝ տեսեք, գնում ենք դեպի խաղաղության, անկախ նրանից, որ այդ թուղթը շատ ավելի լուրջ պրոբլեմներ է ստեղծելու»։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
