«Սահմանադրական դատարանի հրապարակած որոշումից պարզվեց, թե ինչու էր իշխանությունը դեռ 2019 թվականից լայնածավալ արշավ սկսել ՍԴ ու նրա կազմի դեմ»,- ԱԺ հայտարարությունների ժամին ասաց «Հայաստան» խմբակցության պատգամավոր Գեղամ Մանուկյանը։
«Այն ժամանակ էինք ահազանգում, որ իր սրտի Սահմանադրական դատարան ունենալն իշխանության համար հետագա քայլերին դակիչ դառնալու համար է։ Երեկ ՍԴ-ն իր եզրակացությամբ անցավ իր բոլոր լիազորությունները եւ ձեռք բարձրացրեց մեր հանրապետության ծննդյան վկայականի՝ Անկախության հռչակագրի վրա։ ՀՀ Սահմանադրության 168-րդ հոդվածում թվարկված են ՍԴ լիազորությունները, թվով 12-ը։ Անգամ ուշադիր կարդալու դեպքում այստեղ չենք տեսնի Անկախության հռչակագրի կետերի մեկնաբանության լիազորությունը։
Իհարկե, հանուն արդարության պետք է նաեւ փաստեմ, որ ՍԴ-ն իր որոշմամբ չի չեղարկել Անկախության հռչակագիրը, բայց նաեւ հանուն ճշմարտության նորից արձանագրենք, որ ՍԴ-ն կամ անգամ համաժողովրդական հանրաքվեն չեն կարող ձեւափոխել, վերախմբագրել Անկախության հռչակագիրը, ինչը փորձ է կատարել անել դատարանը»,- ասաց Գեղամ Մանուկյանը։
Նա հավելեց․ «Հռչակագրի ընդունման 34-րդ տարում, ցավոք սրտի, Հայաստանում Սահմանադրական դատարանը հարձակվել է փաստաթղթի վրա, ինչը հակասահմանադրական է։ Ինչո՞ւ է որոշման տողատակերում տեղ գտել հռչակագրի առանձին կետերի, մասնավորապես, Արցախին վերաբերվող դրույթի եզրակացությունը։ Այստեղ է թաղված շան գլուխը։ Խուճուճ ձեւակերպումներով ՍԴ եզրակացության այս հատվածը պետք էր իշխանություններին, Նիկոլ Փաշինյանին, որ Ադրբեջանի պահանջներին պատասխանեն։ Ալիեւի պահանջը կատարված է, ՍԴ-ն արդեն ունի որոշում։ Մավրն արեց իր գործը, մավրը կարող է հեռանալ․ այս որոշման հեղինակ Վահե Գրիգորյանը թերեւս առաջիկայում կնշանակվի Եվրադատարանում ՀՀ ներկայացուցիչ»։
Կարդացեք նաև
Ռոզա ՀՈՎՀԱՆՆԻՍՅԱՆ
