«ՀՀ ԱԱԾ-ն բոլոր ներմուծված գրքերը գրաքննության է ենթարկում: Կեցցե Հայաստանը, կեցցե ցենզուրան»,- ֆեյսբուքի իր էջում գրել էր «Անտարես» հոլդինգի նախագահ Արմեն Մարտիրոսյանը:
«ԵԱՏՄ-ից հետո, երբ ընդունվեց ԵԱՏՄ մաքսային օրենսգիրքը, այնտեղ գրված է, որ չի կարելի ԵԱՏՄ տարածք ներմուծել գրքեր, որոնք ահաբեկչություն եւ էքստրեմիզմ են տարածում: Այս պահին հիշեցի, որ 1988-ին մեզ էքստրեմիստ էին ասում: Այսինքն` ստացվում է՝ մեր մասին չի կարելի գրքեր ներմուծել կամ արտահանել, օրինակ` մեր 88-ի շարժման մասին: Արգելում են մանկական պոռնոգրաֆիան, ինչը նորմալ է, եւ սվաստիկա ու սվաստիկա հիշեցնող բաները: Այսինքն, մեր Նորավանքի մասին ալբոմը չենք կարող արտահանել, որովհետեւ ամբողջը սվաստիկա է կամ սվաստիկա հիշեցնող»,-Aravot.am-ի հետ զրույցում ասաց պարոն Մարտիրոսյանը:
«Ես որպես այս պետության քաղաքացի՝ մտածեցի այս հարցը ոնց կլուծեի: Մտածեցի, որ ԱԱԾ-ականը, որը մաքսայինի համազգեստով է՝ աչքի տակով կնայեր, թե ինչը խոչընդոտ կստեղծի կամ չի ստեղծի: Բայց ի՞նչ են անում Հայաստանում. մաքսային բրոքերներին ստիպում են, որ այդ գրքերի ցուցակն ամբողջությամբ ներկայացնեն ԱԱԾ-ին, դրանից հետո այն գրքերը, որոնք ուզում են, իսկ դրանք բոլոր գրքերն են, գնում են ԱԱԾ, իսկ ԱԱԾ-ում նստած են մարդիկ, որոնք կարդում ու որոշում են՝ թողնել կամ չթողնել: «Բուկինիստի» տնօրեն Խաչիկ Վարդանյանի ասածով, օրինակ ԱԱԾ-ն թույլ չէր տվել, որ Անդրանիկ Օզանյանի մասին գիրքը արտահանի… Սա է պատկերը…
Հիմա մեկնաբանությունս՝ հարգելի ՀՀ ԱԱԾ, այսօր 2024 թվականն է, ո՞վ է տեռորիստական գրականություն կարդում ոչ ինտերնետից, ո՞վ է պոռնոգրաֆիա նայում ոչ ինտերնետից, ո՞վ է էքստրեմիզմ նայում ոչ ինտերնետից: Այսինքն, դուք եւ ԵԱՏՄ գործընկերները, որոնք գրել են այդ օրենքը, մեկ դար հետ եք մնացել»,-ասաց մեր զրուցակիցը:
Կարդացեք նաև
Հարցրինք, թե «Անտարեսը» կոնկրետ ինչ գրքերի հեղինակների ու թեմաների պահով է բախվել այդ խնդրին: «Ինչպես եմ ես իմացել այս մասին: Մի գրախանութի տնօրեն, որ լրիվ օրինական ներմուծել էր ռուսական գրքեր, իսկ ռուսական գրողների էլիտան հիմա դրսում է ապրում եւ հրատարակվում, իրեն կանչել էին ԱԱԾ: Զանգեցի մեկ այլ գրախանութի տնօրենի, ասացի՝ կարո՞ղ ես որեւէ լրատվամիջոցի դրա մասին ասել, ասաց՝ գրքեր ներմուծելու եւ արտահանելու հետ կապված խնդիրներ կունենանք, մեկ այլ գրախանութ էլ նույնը ասաց, իսկ ես թքած ունեմ…Հետո իմացա, որ մեր ընկերության բրոքերը դա անում է՝ առանց մեզ ասելու, տանում է գրքերը ԱԱԾ»,-հավելեց Արմեն Մարտիրոսյանը:
«Բուկինիստ» հրատարակչության տնօրեն Խաչիկ Վարդանյան
«Բուկինիստի» տնօրեն Խաչիկ Վարդանյանն Aravot.am-ի հետ զրույցում ասաց, որ միջադեպը վաղուց է եղել, Անդրանիկ Օզանյանի գիրքը 4 տարի առաջ է արգելվել, իսկ Հայաստանի ազատագրության հայ գաղտնի բանակի մասին գրքի պատճառով իրենց ֆեյսբուքյան էջն արգելափակվել է:
Գոհար ՀԱԿՈԲՅԱՆ
Արմեն Մարտիրոսյանի լուսանկարը՝ ԿԳՄՍ-ի
