«Արցախի Ազգային ժողովից պահանջում ենք ստեղծել մի հանձնաժողով կամ ինչ-որ կառույց, որը պետք է ստուգի Արցախում տեղի ունեցած կողոպուտը, եւ այդ գումարները պետք է հանրայնացվեն»,- այսօր Երեւանում Արցախի ներկայացուցչության շենքի մոտ լրագրողներին ասաց արցախցի փաստաբան Ռաֆայել Մարտիրոսյանը։
Այսօր Երեւանում Արցախի ներկայացուցչության մոտ էին հավաքվել Արցախի անվտանգության խորհրդի նախկին քարտուղար Սամվել Բաբայանի կողմնակիցները։ Նրանք ավելի վաղ իրազեկել էին, որ Արցախի ներկայացուցչություն են գալիս՝ Արցախի իշխանություններին տեղեկացնելու Սամվել Բաբայանի առաջարկների մասին։
Ռաֆայել Մարտիրոսյան
Հարցին՝ Հայաստանի իշխանություններն ամեն ինչ անում են, որպեսզի փակեն Արցախի էջը, արդյոք իրենք ճի՞շտ հասցեով են եկել, ինչո՞ւ պահանջները չեն ներկայացնում ՀՀ կառավարությանը, Ռաֆայել Մարտիրոսյանը պատասխանեց․ «Նախ պետք է իրավական պատկերացնում կազմենք, թե ինչ է իրականում տեղի ունեցել։ ՀՀ հայտարարությունը, որ Արցախը որպես միջազգային իրավունքի սուբյեկտ չի հանդիսանում, իհարկե, ընդունում ենք։ Սակայն այնպես չէ, որ չճանաչված պետությունները չունեն սուբյեկտայնության իրավունքներ։ Իսկ դա նշանակում է, որ այդ իրավունքների շրջանակներում Արցախի Հանրապետության պետական կառավարման մարմինները որոշակի պարտավորություններ են կրում իր բնակչության համար։ Որպես այդպիսին, այսօր հանդիսանում է Ազգային ժողովը, եւ Ազգային ժողովը պետք է հանրությանը հետաքրքրող հարցերի վերաբերյալ գործուն միջոցներ ձեռնարկի՝ պարզելու համար Արցախում տեղի ունեցած կողոպուտի հանգամանքները։ Այդ գումարները պետք է վերադարձվեն հանրությանը։ Այդ ստուգման արդյունքները կներկայացվեն ՀՀ իրավապահ մարմիններին՝ քրեական վարույթ նախաձեռնելու համար, քանի որ այդ գումարներն Արցախ են մտել ՀՀ բյուջեից»։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
