«Հարաբերություններ կարգավորելը երկրի իշխանությունների պարտականություններից մեկն է, ընդ որում՝ ե՛ւ ռազմավարական գործընկերների, ե՛ւ հարեւանների, ե՛ւ նաեւ թշնամիների, որ խաղաղության օրակարգն առաջ քաշվի: Բայց այդ հարաբերությունները պետք է արժանապատիվ լինեն: Եթե այդ հրավերը ոչ թե ստանում ես, այլ դու ես խնդրում, երբ ժպտերես դեմքով հանդիպում ես մի պետության ղեկավարի հետ, որը ե՛ւ ցեղասպանություն է իրականացրել, ե՛ւ մեկ տարի առաջ աջակցել Արցախի ժողովրդի նկատմամբ ցեղասպանությանը, ես գտնում եմ, որ որոշակի չափով ազգային խայտառակություն է: Նսեմացման պահ է: Ես գտնում եմ, որ ոչ միայն ՀՀ վրա են ճնշումները շարունակվում, այլ մեր «հարեւանները»՝ թուրք-ադրբեջանական տանդեմը, գտել է այն ղեկավարին, որը պարտվել է ու կոնկրետ պարտադրանքներ են իրականացնում Փաշինյանի նկատմամբ՝ ՀՀ նկատմամբ առավելություններ ունենալու համար»,- այսօր Եռաբլուրում 44-օրյա պատերազմի 4-րդ տարելիցի օրը լրագրողների հետ զրույցում ասաց Աժ «Հայաստան» խմբակցության պատգամավոր Սեյրան Օհանյանը:
Արփինե ՍԻՄՈՆՅԱՆ
