«Այն, ինչ այսօր կապված է Արցախի ռազմաքաղաքական ղեկավարության հետ, կամ նրանց՝ Բաքվի բանտերում գտնվելու հանգամանքի հետ, շատ ստորացուցիչ է։ Սա նաև հավաքական, պետական տեսանկյունից նվաստացուցիչ է։ Ցանկացած առիթ պետք է օգտագործենք մեր ձայնը բարձրացնելու համար։ Եթե նրանք գտնվում են Բաքվի բանտերում, բացի նրանից, որ սա մեր բոլորի պատվի, արժանապատվության հարցն է, սա նշանակում է, որ պատերազմը չի ավարտվել»,-Սուրբ Աննա եկեղեցու բակում լրագրողների հետ ճեպազրույցում ասաց ԱՀ ԱԺ նախկին նախագահ, Արցախի Ժողովրդավարական կուսակցության նախագահ Աշոտ Ղուլյանը։
Նա վստահեցրեց՝ քանի ռազմագերիները Բաքվում են, պատերազմը չենք կարող համարել ավարտված՝ ինչքան էլ փորձենք մեզ խաբել խաղաղության պայմանագրի թղթերով․ «Մենք պետք է հաշվի առնենք, որ այդ մարդկանց քաղաքական որոշումներից է կախված եղել Հարավային Կովկասում խաղաղությունը և կայունությունը։ Այսօր նրանց մեղադրել մտացածին մեղադրանքների մեջ, նշանակում է ջուր լցնել այն քարոզչական երևույթների վրա, որը փորձում է առաջ տանել Ադրբեջանը։ Պետական բոլոր հնարավոր միջոցներով պետք է հասնենք նրան, որ Ռուբեն Վարդանյանը, Դավիթ Մանուկյանը և Արցախի ռազմաքաղաքական ղեկավարները, որոնք ռազմագերու կարգավիճակում են և մեր մյուս գերիների վերադարձը կարողանանք ապահովել»։
Աշոտ Ղուլյանը վստահեցրեց՝ ՀՀ իշխանությունների կողմից բավարար աշխատանք չի տարվում գերիների վերադարձի հետ կապված։
Կարդացեք նաև
Տաթև ՀԱՐՈՒԹՅՈՒՆՅԱՆ
