«Նիկոլ Փաշինյանի ելույթը ելնում է այն առաջնահերթությունից, որն այսօր կա, որը ՀՀ իշխանության համար օրակարգային է»,-Սուրբ Աննա եկեղեցու բակում լրագրողների հետ ճեպազրույցում ասաց ՀՀ ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով ՀՀ վարչապետ Նիկոլ Փաշինյանի՝ ՄԱԿ-ի Գլխավոր վեհաժողովի 79-րդ նստաշրջանի շրջանակում անցկացված Ապագայի գագաթնաժողովին արված հայտարարությանը։
Լրագրողների այն հարցին, թե ինչու այդ ելույթում հայ ռազմագերիների մասին վկայակոչում չկար, Տիգրան Աբրահամյանն արձագանքեց՝ իր համար զարմանալու բան այդտեղ չկա․ «Իշխանության բառապաշարն անգամ ներքին լսարանի համար շատ ավելի վնասում է այս գործընթացին, քան կարող է օգնել։ Նիկոլ Փաշինյանի ու Ադրբեջանի իշխանությունների մոտեցումները ռազմագերիների և հատկապես Արցախի նախկին ռազմաքաղաքական իշխանության հետ կապված ներդաշնակ են»։
Հարցին՝ ի՞նչ կփոխի COP29-ին ՀՀ կառավարության ներկայացուցիչների մասնակցությունը, Տիգրան Աբրահամյանը պատասխանեց․ «Որևէ բան չի փոխելու, դա բացառապես աշխատելու է Ադրբեջանի միջազգային հեղինակության բարձրացման ուղղությամբ։ Ադրբեջանն արդեն իր ստանալիքի մի մասին հասել է։ Ադրբեջանը նաև հասավ նրան, որ ՀՀ-ն իր վետոյի իրավունքը չկիրառեց այդ համաժողովի՝ Ադրբեջանում անցկացման հարցով։ Զուգահեռ իրականությունում Ադրբեջանի նախագահը նոր ձևավորված խորհրդարանի անդրանիկ նիստում բավականին կոշտ գնահատականներ հնչեցրեց ՀՀ-ի՝ հետագա սպառազինության հետ կապված՝ հնչեցնելով ուղիղ սպառնալիք»։
Ըստ պատգամավորի՝ Ադրբեջանն ի սկզբանե գերիների՝ հումանիտար բնույթի հարցը դարձրել է քաղաքական առևտրի առարկա․ «44-օրյա պատերազմից հետո անընդհատ կիրառվել է դա, այդ հարցն անընդհատ օգտագործվել է ՀՀ-ից նոր զիջումներ ստանալու համար։ ՀՀ-ն մտել է այդ խաղի մեջ՝ գնալով արևտրի՝ դրանով պայմանավորված այս գործընթացն անընդհատ շարունակվել և մեզ նոր զիջումների առաջ է կանգնեցնել։ Միջազգային հումանիտար իրավունքի տեսանկյունից անթույլատրելի է այդ հարցը դարձնել շահարկման կամ այդպիսի առևտրի առարկա՝ անկախ նրանից՝ վերաբերում է սովորական քաղաքացիական անձ ռազմագերիներին, թե՝ Արցախի ռազմաքաղաքական ղեկավարությանը»։
Կարդացեք նաև
Տաթև ՀԱՐՈՒԹՅՈՒՆՅԱՆ
