«Ես կուզեի, որ Գրիգոր Մինասյանը Սահմանադրություն կարդա։ Արդարադատության նախարարը, փաստորեն, Սահմանադրություն չի կարդացել և չգիտի, որ պատգամավորները խժդժություններով չեն զբաղված, նրանք Սահմանադրությամբ վերապահված իրենց լիազորություններն են իրականացնում»,-լրագրողների հետ ճեպազրույցում ասաց ՀՀ ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով ՀՀ արդարադատության նախարար Գրիգոր Մինասյանի հայտարարություններին։
Հիշեցնենք՝ ՀՀ Արդարադատության փոխնախարար Սիրվարդ Գևորգյանի հրաժարականի առիթով նախարարը գրել էր․ «Շատ ափսոս, որ առանձին անհատների չափազանց անարդար ու մանրախնդիր հարձակումների պատճառով մեր նախարարությունը և պետական համակարգը կորցրեց իրապես արժեքավոր մասնագետի ու կառավարչի»։
Անդրանիկ Քոչարյանը հիշեցրեց՝ մեր ժողովուրդը դժգոհ է երկրում արդարադատության բարեփոխումների ընթացքից կամ բովանդակությունից և կադրային քաղաքականությունից․ «Պարոն Մինասյանը շատ անթույլատրելի, վտանգավոր հայտարարություն է արել։ Արդարադատության նախարարն ԱԺ պատգամավորին մեղադրում է խարդավանքների մեջ։ Կներեք, դա սահմանադրական կարգի հետ կապված մի բանավոր տեքստ է։ Եթե պարոն Մինասյանը մնալու է նախարար, պետք է գա այստեղ, բացատրություն տա՝ ո՞վ է խարդավանքով զբաղվող պատգամավորը։ Լավ կլինի, որ պարոն Մինասյանը նորից ընթերցի Սահմանադրությունը։ Փոխնախարարի հրաժարականը, չեմ ասում՝ քրեակատարողականի ղեկավարի հետ կապված, կարող է էլի հրաժարականներ լինեն․ դա արդեն ԱԺ քննելիք հարցը չէ։ Գրիգոր Մինասյանն իրավունք չունի պատգամավորի արած հայտարարությանը որակավորում տալ՝ օրինակ` խարդավանք։ Թող գնա, Սահմանադրություն կարդա»։
Հարցին՝ Կարեն Անդրեասյանի հարցն էլ է քննարկվո՞ւմ, Անդրանիկ Քոչարյանը պատասխանեց․ «Կարեն Անդրեասյանն ինքն է քննարկում այդ թեման։ Չգիտեմ՝ ինչքանով է ճիշտ, բայց իրենք ոնց որ թե իրար հետ շատ մտերիմ են»։
Կարդացեք նաև
Տաթև ՀԱՐՈՒԹՅՈՒՆՅԱՆ
