4 տարի առաջ այս օրը Ադրբեջանը Թուրքիայի եւ այլ պետությունների աջակցությամբ լայնածավալ հարձակում սկսեց Արցախի, ինչու չէ՝ ՀՀ վրա: Այս մասին այսօր Եռաբլուրում լրագրողների հետ զրույցում ասաց Արցախի նախագահ Սամվել Շահրամանյանը:
«Մեր Զինված ուժերն ընդունել է այդ պայքարը ու մեր նահատակներին այսօր հարգանքի տուրք ենք մատուցել եւ իրենց շնորհիվ հնարավոր է եղել կանխել 44-օրյա պատերազմի ավելի աղետալի հետեւանքները: Ես համարում եմ, որ 44-օրյա պատերազմի արդյունքներով դրվել է Արցախի ճակատագիրը կանխորոշելու հիմքը»,- ասաց Շահրամանյանը:
Ինչ վերաբերում է պատերազմում պարտության մեղավորներին՝ պարոն Շահրամանյանն ասաց, որ ՀՀ-ում բազմաթիվ քրեական գործեր կան հարուցված, հիշեցրեց, որ ԱԺ-ում էլ համապատասխան քննիչ հանձնաժողովն է գործել, որը առաջիկայում կհրապարակի արդյունքները, իրենք էլ համապատասխան հետեւությունները կանեն. «Հանձնաժողովի եզրակացությունը մեզ համար հիմք է լինելու: Մենք, իհարկե, ունենք մեր կարծիքները, բայց դրանց մասին կարելի է խոսել քրեական գործերի արդյունքներին տեղեկանալով»:
Կարդացեք նաև
Դիտարկմանը, որ Նիկոլ Փաշինյանը պարտության համար սլաքներն իր կողմն է ուղղում՝ նշելով, որ նախկին իշխանությունների կողմից եք բերվել իշխանության, Սամվել Շահրամանյանն այսպես արձագանքեց. «Շատ բան է խոսվում, մնում է այդ ամենը հիմնավորվի»:
Հարց հնչեց, թե ի վերջո, ով ու ինչու այս ամենը վերջին օրերին իր գրպանը գցեց, ի պատասխան Սամվել Շահրամանյանն ասաց. «Մենք 2023 թվականի սեպտեմբերին հայտնվել ենք ծանր իրավիճակում: Ստանձնել եմ այդ պատասխանատվությունը, երբ Արցախից բոլորը հրաժարվել են, կայացրել ենք որոշումներ՝ ելնելով ստեղծված իրավիճակից»:
Հարցին, թե ինչպես իրեն հաջողվեց ուղղաթիռով գալ ՀՀ ու չգերեւարվել, իսկ Արցախի նախկին ու ներկա ղեկավարության մյուս ներկայացուցիչներին նույնը չհաջողվեց, ի պատասխան Շահրամանյանն ասաց. «Ես չեմ կարող մեկնաբանել որոշումները, որոնք կայացվում էին Ադրբեջանում: Այդ մարդկանց ձերբակալելու, գերեւարելու որոշումները կայացնում էին ադրբեջանցիները, չգիտեմ՝ ինչու իմ պահով նման որոշում չի կայացվել»:
Արփինե ՍԻՄՈՆՅԱՆ
