Կառավարությունն այսօրվա նիստում հաստատեց Հայաստանի պետական տնտեսագիտական համալսարանի ռեկտորի ընտրության արդյունքները։
Սեպտեմբերի 6-ին տեղի է ունեցել «Հայաստանի պետական տնտեսագիտական համալսարան» ՊՈԱԿ-ի ռեկտորի թափուր պաշտոնը զբաղեցնելու համար մրցույթ, որին մասնակցելու համար գրանցվել էր չորս հավակնորդ՝ Արսեն Պետրոսյանը, Արմեն Գրիգորյանը, Էդգար Ղազարյանը, Ատոմ Մարգարյանը: Փակ քվեարկությունից հետո հաշվիչ հանձնաժողովն արձանագրել է ձայների հետեւյալ արդյունքը՝ Արմեն Գրիգորյան՝ 19 կողմ, Ատոմ Մարգարյան՝ 1 կողմ, Արսեն Պետրոսյան՝ 0 կողմ, Էդգար Ղազարյան՝ 0 կողմ: Համալսարանի կանոնադրության 25-րդ կետի համաձայն՝ խորհրդի անդամների 19 կողմ ձայնով տնտեսագիտության թեկնածու, դոցենտ Արմեն Գրիգորյանն ընտրվել է Հայաստանի պետական տնտեսագիտական համալսարանի ռեկտորի պաշտոնում՝ 5 տարի ժամկետով:
Արմեն Գրիգորյանն ասաց, որ իր հետագա բոլոր ջանքերը կենտրոնացնելու է համալսարանի միջազգային ծրագրային հավատարմագրման գործընթացներն առաջ մղելու ուղղությամբ։ «Առիթն օգտագործելով՝ ցանկանում եմ ձեզ հրավիրել նաեւ համալսարան՝ բաց դասախոսություններով հանդես գալու»,- կառավարության անդամներին դիմեց նորընտիր ռեկտորը։
Կառավարության նիստը վարող փոխվարչապետ Մհեր Գրիգորյանը հարցրեց ռեկտորին․ «Իսկ ձեր կարծիքով՝ համալսարանը ե՞րբ կարող է տեղ գտնել, զբաղեցնել որեւիցե միջազգային վարկանիշային աղյուսակում, գոնե 100-ի մեջ»։ ԿԳՄՍ նախարար Ժաննա Անդրեասյանը ուղղեց փոխվարչապետի սխալը․ «Պարոն Գրիգորյան, մեր ռազմավարությամբ 500-ի մեջ պիտի տեղ գտնենք»։
Կարդացեք նաև
«Ես ուզում եմ, որպեսզի չզսպենք նորանշանակ մենեջերի ամբիցիաները, բայց եկեք՝ 500-ի մեջ»,- արձագանքեց Մհեր Գրիգորյանը։
Արմեն Գրիգորյանն ասաց, որ թոփ 500-ում ներգրավվելն ավելի իրատեսական է, քան թոփ 100-ում։ «Կարծում եմ՝ 5 տարին բավարար ժամանակահատված է՝ Եվրոպայի թոփ 300 համալսարանների եւ աշխարհի թոփ 1000 համալսարանների շարքում մեր համալսարանը հաստատապես տեսնելու համար»,- հավելեց ռեկտորը։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
