Նյու Յորքի «Կարնեգի» կոռպորացիայի նախագահ և «Ավրորա» մարդասիրական նախաձեռնության մրցանակակրի ընտրության հանձնաժողովի անդամ Լուիս Ռիչարդսոնի, «Ավրորա» մարդասիրական նախաձեռնության և «Մոդերնա» ընկերության համահիմնադիր Նուբար Աֆեյանի, «The Team B» կազմակերպության գլխավոր տնօրեն Լեահ Սելինգմանի և ՄԱԿ Գլոբալ կոմպակտի նախկին փոխնախագահ և «Ունիլեվերի» գլխավոր տնօրեն Փոլ Փոլմանի հովանու ներքո՝ սեպտեմբերի 25-ին կլոր սեղան քննարկում-նախաճաշ է անցկացվել կլիմայի փոփոխության և մարդու իրավունքների պաշտպանության թեմայով՝ Բաքվում կայանալիք COP 29-ին ընդառաջ։
Հրավիրված փորձագետների, փաստաբանների և մեդիայի ներկայացուցիչների ուշադրության կենտրոնում COP 29-ի հաջող անցկացման հնարավորություններն էին, այն համատեքստում, որ ադրբեջանական կողմը COP 29-ը հայտարարել է «Խաղաղության COP»:
Քննարկման մասնակիցներն արձանագրեցին, որ նոյեմբերի 11-ին մեկնարկող COP 29-ին երկու ամսից քիչ ժամանակ է մնում։ Քննարկման մասնակիցների խոսքով՝ Ադրբեջանը պետք է այնպես անի, որպեսզի կառուցողական և դրական դերակատարում ունենա ինչպես ազգային, այնպես էլ միջազգային մակարդակներում՝ որպես COP 29-ը հյուրընկալող պետություն։
Կլոր սեղանի մասնակիցները մտահոգված էին, որ COP հեղինակավոր համաժողովը վստահվել է Բաքվին, երբ նախորդ տարի հայաթափվեց Լեռնային Ղարաբաղը, իսկ Իլհամ Ալիևի ռեժիմը շարունակում է հայ պատանդներ պահել։
Կարդացեք նաև
Քննարկման անցկացման շարժառիթներից էին նաև Ադրբեջանում մարդու իրավունքների զանգվածային խախտումները և կլիմայական իրավիճակը։
Հիշեցնենք. COP-ը ամենամյա ՄԱԿ կլիմայի փոփոխության համաժողովն է:
Հայաստանը դեմ էր COP 29-ի՝ Բաքվում անցկացմանը, սակայն անցած տարվա դեկտեմբերի 7-ին Հայաստանի վարչապետի աշխատակազմը և Ադրբեջանի նախագահի վարչակազմը հայտարարեցին, որ Երևանը հանում է իր վետոն: Արդյունքում 32 հայ զինծառայողներ վերադարձան հայրենիք:
Այնուամենայնիվ, միջազգային ոչ-կառավարական մի շարք կազմակերպություններ շարունակում են դատապարտել այն հանգամանքը, որ COP 29-ը տեղի է ունենալու մի երկրում, որտեղ կլիմային ահռելի վանս է հասցվում, խախտվում են ընդդիմադիր հայացքներ կրող քաղաքացիների իրավունքներն ու ազատությունները և պատանդառության մեջ են պահվում ազգությամբ հայեր, այդ թվում՝ Արցախի ռազմաքաղաքական ղեկավարությունը:
Արսեն ԱՅՎԱԶՅԱՆ
