Մաեստրո Սիփան Օլահը և Լոնդոնում գործող հայտնի «Քլինգեն» կամերային անսամբլը հաջողությամբ ավարտեցին իրենց առաջին համերգային շրջագայությունը Հնդկաստանում՝ գերելով հանդիսատեսին Կալկաթայում, Նյու Դելիում և Չեննայում։ Այս եզակի ելույթները կազմակերպվել էին Հնդկաստանում Հայաստանի դեսպանության կողմից՝ Կալկաթայի Սուրբ Նազարեթ հայկական եկեղեցու, Հնդկաստանի մշակութային կապերի խորհրդի (ICCR), Չեննայում Հայաստանի պատվավոր հյուպատոսի և Քլինգեն երգչախումբ և մշակութային ասոցիացիայի հետ համատեղ:
Երաժիշտներ Հայարփի Եղիկյանը` սոպրանո, Պոլինա Շարաֆյանը` ջութակ, Ջեք Հակոբ Մուրադյանը` հոբոյ, Նիկիտա Դեմիդենկոն` դաշնամուր Լոնդոնից` համագործակցելով Վաչե Թադևոսյանի հետ` անգլիական փող, Սոմնաթ Մախալը` թավջութակ Կալկաթայից, իրենց կատարումներով գերեցին հանդիսատեսին:
Մշակութային Փոխանակման Տոն
Համերգաշարը նվիրված էր Հայաստանի Հանրապետության անկախության 33 ամյակին և ֆրանսահայ լեգենդար երգիչ, կոմպոզիտոր Շառլ Ազնավուրի ծննդյան 100 ամյակին։ Ներկայացումներում հնչեցին հայ նշանավոր կոմպոզիտորների գլուխգործոցները, այդ թվում՝ Կոմիտասի, Արամ Խաչատրյանի, Առնո Բաբաջանյանի, Ղազարոս Սարյանի և Ռոբերտ Ամիրխանյանի գործերը, որոնցից շատերը առաջին անգամ էին հնչում Հնդկաստանում։
Կարդացեք նաև
Կալկաթա – Համերգաշարի բացման հանդիսությունը տեղի ունեցավ 2024 թվականի սեպտեմբերի 18-ին՝ Կալկաթայի Հայկական քոլեջում և Մարդասիրական ակադեմիայում։ Միջոցառումը կազմակերպվել էր Հայաստանի դեսպանության և Կալկաթայի Սուրբ Նազարեթ հայկական եկեղեցու համագործակցությամբ։ Ներկայացումներն իրենց մասնակցությամբ արժևորեցին մաեստրո Սիփան Օլահը, Քլինգեն կամերային անսամբլը և Հայկական քոլեջի քառաձայն երգչախումբը։ Այս միջոցառումը նշանավորվեց առաջին հայկական դասական համերգի կազմակերպմամբ Կալկաթայում՝ նշելով Հայաստանի և Հնդկաստանի միջև պատմական խոր կապերը։
Նյու Դելի – 2024 թվականի սեպտեմբերի 19-ին և 20-ին, Քլինգեն կամերային անսամբլի համերգները տեղի ունեցան համապատասխանաբար Grand Hotel-ում և ICCR-ի «Ազադ Բհավան» համերգասրահում։ Սեպտեմբերի 19-ի միջոցառումը կարևորվեց Հնդկաստանի արտաքին գործերի պետական նախարար Կիրթի Վարդան Սինգհի մասնակցությամբ, ով միացավ Հայաստանի դեսպան Վահագն Աֆյանին՝ նշանավորելու այս կարևոր մշակութային իրադարձությունները։ Միջոցառմանը ներկա էին ավելի քան 50 դեսպաններ, դիվանագետներ և ավելի քան 200 հարգարժան հյուրեր, ովքեր մեծ հիացմունքով ընդունեցին մաեստրո Օլահի ղեկավարած անսամբլի կատարումները։ Երրորդ համերգի ընթացքում անսամբլի անդամները Ռոտարի շրջանների կողմից արժանացան հատուկ մրցանակների՝ ICCR-ում իրենց վառ ելույթի համար, որն արժանացավ հանդիսատեսի բուռն ծափահարությունների և հիացմունքի:
Չեննայ – Համերգային շրջագայության եզրափակիչ համերգը տեղի ունեցավ 2024 թվականի սեպտեմբերի 21-ին՝ Taj Club House հյուրանոցում։ Այս միջոցառումը կազմակերպվել էր Չեննայում Հայաստանի պատվավոր հյուպատոս Շիվկումար Իշվարանի հետ համատեղ։ Ելույթները, որոնք ևս մեկ անգամ նշեցին Հայաստանի անկախությունը և Ազնավուրի հարյուրամյակը, արժանացան հիացմունքի և հատուկ հուշանվերների՝ Հայաստանի և Հնդկաստանի միջև մշակութային փոխանակման գործում ունեցած ներդրման համար:
Մշակութային և Պատմական Նշանակություն
Համերգներից դուրս, շրջագայությունը նշանավորվեց նաև մի շարք կարևոր այցելություններով և մշակութային փոխանակմամբ։ Կալկաթայում երաժիշտները այցելեցին հայկական պատմական վայրեր, այդ թվում՝ Հայկական քոլեջը և մարդասիրական ակադեմիան, 1724 թվականին կառուցված Նազարեթի Սուրբ եկեղեցին, և Վիկտորիա հուշահամալիրը։ Մայր Թերեզայի հուշահամալիրի այցելությունը հատկապես հուզիչ էր՝ հաշվի առնելով նրա հայկական արմատները։
Նյու Դելիում անսամբլը այցելեց Հայաստանի դեսպանություն, որտեղ նրանց ջերմ ընդունեց դեսպան Վահագն Աֆյանը։ Երաժիշտները նաև հարգանքի տուրք մատուցեցին India Gate-ում՝ ի հիշատակ Առաջին համաշխարհային պատերազմի ժամանակ զոհված զինվորների։ Չեննայում խումբը այցելեց 1712 թվականին կառուցված հայկական Սուրբ Մարիամ եկեղեցին և քննարկումներ անցկացրեց Երաժշտական ակադեմիայի հետ՝ հետագա համագործակցության համար։
Շրջագայության Ամփոփում
Այս շրջագայությունը, որին մասնակցությունն աննախադեպ մշակութային իրադարձություն էր, ոչ միայն հնչեցրեց Հայաստանի հարուստ երաժշտական ժառանգությունը, այլև ամրապնդեց մշակութային կապերը Հայաստանի և Հնդկաստանի միջև։ Քլինգեն կամերային անսամբլի ջերմ ընդունելությունը և համերգների հաջողությունը հիմք ստեղծեցին երկու երկրների միջև ապագա համագործակցությունների և մշակութային փոխանակումների համար:
Մամուլի հաղորդագրություն
