Արարատի մարզի Տիգրանաշեն համայնքի հիմնական դպրոցում 5-րդ դասարանի աշակերտի նկատմամբ ֆիզիկական բռնության դեպքով երեկ հարցաքննվել են բռնության մասին ահազանգած աշակերտը, նրա համադասարանցիներն ու գրականության ուսուցչուհին, որն էլ հավանական բռնարարն է:
Աշակերտը՝ Վալերին, պատմում է, որ գրականության ուսուցչուհին դասը չսովորելու համար իրեն ուժեղ ապտակել է, մատների հետքը թողնելով իր այտին:
Դպրոցի տնօրեն Լիլի Մելքոնյանը Aravot.am-ին պատմեց, որ դեպքի մասին տեղեկացել է համացանցից, խոսել է բռնության մասին ահազանգած աշակերտի, նրա համադասարանցիների հետ, վերջիններս հաստատել են կատարվածը, միայն դասարանի մի աշակերտ է ասել՝ նման բան չի տեսել:
Իսկ աշակերտին ապտակած ուսուցչուհին՝ Ասատրյանը, ըստ դպրոցի տնօրենի, հերքել է աշակերտի նկատմամբ իրեն վերագրվող թույլ տված ֆիզիկական բռնությունը, ասել է, որ միայն քաշել է երեխայի ձեռքից. «Ուղղակի այդ ուսուցչուհին կաշվից դուրս գալով ՝փորձել է այդ երեխային ինչ-որ բաներ սովորեցնի, նույնիսկ տառերը: Այդ երեխան տեղափոխվել է մեր դպրոց, տառ չի իմացել: Այս էլ երկրորդ տարին է, այդ ուսուցչուհին է տանջանքով, ամեն ինչով այդ երեխային տառ սովորեցրել, գրիչ բռնել սովորեցրել: Չի կարելի մանկավարժի այդքան վաստակը բանսարկություններով տապալել»:
Կարդացեք նաև
Տնօրենի խոսքով, սուտ է, որ ծնողները 2021 թվականից բռնության մասին նույնիսկ մարզպետարանում են ահազանգել, բայց ոչինչ չի արվել, բայց խնդրին լուծում չի տրվել: Նրա խոսքով, սա առաջին դեպքն է, որ նման խնդրի մասին ահազանգ է եղել:
Լիլի Մելքոնյանի խոսքով, Վալերիին տեսանկարահանողը ու տեսանյութը համացանցում տարածողը դպրոցի ծնողներից մեկն է, որը նաեւ դպրոցի նախկին դռնապանն է. «Ոնց կարող է նման բան լինել: Ես ամբողջ օրը միջանցքով գնում, գալիս եմ, ինքս էլ դասավանդում եմ, ես տեղյակ եմ՝ պատերից այն կողմ ինչ է տեղի ունենում»:
Արփինե ՍԻՄՈՆՅԱՆ
