ՀՀ Հակակոռուպցիոն կոմիտեում քննվող քրեական վարույթի շրջանակներում երկու օր առաջ ձերբակալվել էր Արթիկ խոշորացված համայնքի Հովտաշեն գյուղի վարչական ղեկավար, ազատամարտիկ Սեյրան Փիլոսյանը։ Ըստ մամուլի հրապարակումների, նա կասկածվում է պաշտոնեական լիազորությունները չարաշահելու մեջ։
Մեր տեղեկություններով, դատարանը որոշել է Սեյրան Փիլոսյանի նկատմամբ որպես խափանման միջոց սահմանել տնային կալանքը։ Թե կոնկրետ ինչ քրեական վարույթի շրջանակում են նրան կալանավորել, Արթիկ խոշորացված համայնքի պատասխանատուները հստակ չգիտեն, միայն տեղյակ են, որ գործն առնչվում է ոչ թե որպես վարչական ղեկավար, այլ գյուղապետ աշխատած տարիներին նրա գործունեության հետ։ Բանն այն է, որ Սեյրան Փիլոսյանը մոտ 20 տարի եղել է Հովտաշենի գյուղապետ, Արթիկի համայնքների միավորումից հետո նշանակվել է նույն գյուղի վարչական ղեկավար։
Գյուղապետը երկար տարիներ եղել է ՀՅԴ-ական, թեև ըստ մամուլի հրապարակումների, 2021 թվականին ՏԻՄ ընտրություններին մասնակցել է ՔՊ-ի ցուցակով։
Նա մասնակցել է արցախյան թե՛ առաջին և թե՛ քառօրյա պատերազմներին։ Սեյրան Փիլոսյանը 44 օրյա պատերազմից հետո աչքի է ընկել իր թունդ ընդդիմադիր կեցվածքով, նա պահանջում էր Նիկոլ Փաշինյանի ու նրա վարչախմբի հրաժարականը։
Նունե ԱՐԵՎՇԱՏՅԱՆ
