«Սա Հայաստանի վերջին շանսն է, որ կարողանանք կազմել հզոր հայրենիք, որովհետեւ պետք ունենք վերամիացնել Հայաստան-Արցախ-Սփյուռք իրականությունը: Սա միայն իշխանափոխությամբ է հնարավոր: Իշխանությունն արդեն հանձնել է Արցախը, փորձում է պառակտել Սփյուռքը եւ բաժանեց Հայաստանի ժողովրդին: Եթե նոր ապագա ենք փնտրում հայ ազգի համար, պետք է գնանք դեպի իշխանափոխություն»,- այսօր լրագրողների հետ զրույցում ասաց ՀՅԴ Բյուրոյի անդամ, Ֆրանսիայի հայկական կազմակերպությունների համակարգող խորհրդի (CCAF) համանախագահ Մուրադ Փափազյանը:
Ըստ նրա՝ իշխանությունները նպատակ ունեն իրենց ձեռքն առնել Սփյուռքը. «Ուզում են իրենց Սփյուռքը, որ Սփյուռքը իրենց գրպանում լինի, ինչը անկարելի է: Հայաստանի որեւէ իշխանություն այդպիսի նպատակ չի ունեցել: Բոլորը ընդունել են, որ Սփյուռքը ինքնուրույն լինի, որովհետեւ Սփյուռքը Հայաստանի ծովն է»:
Մուրադ Փափազյանը նկատեց նաեւ, որ այս քաղաքականությամբ Նիկոլ Փաշինյանը Հայաստանը տանում է ինքնասպանության. «Ինքն իրավունք ունի իր կարծիքն ունենալ, բայց իրավունք չունի ժողովրդին խաբել: Մեզ ասվեց, որ Փաշինյանը երկու անգամ ընտրվեց ժողովրդի կողմից, բայց իր ընտրական ծրագրում չկար Արցախի հանձնումը: Հայաստանի ժողովրդին ծախեց այդ գաղափարով, որ միասին պիտի որոշումներ կայացնենք, չեղավ սա: Նիկոլ Փաշինյանը չասաց, որ սահմանները պետք է բացի, Հայաստանի մի կարեւոր մաս պիտի փոխանցի Ադրբեջանին»:
Կարդացեք նաև
Արփինե ՍԻՄՈՆՅԱՆ
