«Հայաստանի իշխանությունները, խոսելով երկրի անվտանգության մասին, որը ներառում է երկու բաղադրիչ՝ հզոր բանակի ստեղծում ու դրան զուգահեռ խաղաղության օրակարգն է, կտրուկ շեշտը դնում են միայն խաղաղության օրակարգի վրա՝ հույսներս դնելով, որ դրանով կարելի է ապահովել անվտանգություն։ Ես այսօրվա արտաքին քաղաքականությունը նմանեցնում եմ «Шведский синдром» հասկացությանը, երբ զոհը փորձում է արտահայտել սեր, ըմբռնում ահաբեկչի նկատմամբ: Այնուամենայնիվ հստակ կարելի է ասել, որ նման դրսևորումն Ադրբեջանի ու Թուրքիայի հանդեպ դժվար թե ցանկալի արդյունք տա»,- Եռաբլուր զինվորական պանթեոնում լրագրողների հետ զրույցում ասաց Արցախի հանրապետության Ազգային ժողովի նախագահի պաշտոնակատար Գագիկ Բաղունցը՝ հավելելով, որ մեկ տարի առաջ կատարված ողբերգությունը՝ արցախցիների բռնի տեղահանումը, Արցախի հայաթափումը, մեծ հաշվով, այդպես էլ հայ ազգի համար դաս չդարձավ։
Ադրբեջանի կողմից Արցախի բռնազավթման եւ Արցախի ժողովրդի բռնի տեղահանության տարելիցի կապակցությամբ այսօր Արցախի հանրապետության գործադիր, օրենսդիր իշխանության ներկայացուցիչները «Եռաբլուր» զինվորական պանթեոնում էին։ Նրանք ծաղիկներ խոնարհեցին՝ հարգանքի տուրք մատուցելով Արցախի համար նահատակված բոլոր հայրենակիցների համար։
Գագիկ Բաղունցի մատուցմամբ, ինչպես էլ անվանենք տեղի ունեցածը՝ ցեղասպանություն, բռնի տեղահանում, թե մեկ այլ բան, շատ հստակ պետք է հասկանանք, որ դա մեկ դարի առաջ տեղի ունեցած Մեծ Եղեռնի շարունակությունն է։
Պատասխանելով՝ Արցախի իշխանությունների, արցախցիների մասին ՀՀ իշխանության ներկայացուցիչների հայտարարություններին, նրանց դեմ կատարվող քայլերին վերաբերվող հարցերին, Գագիկ Բաղունցն ասաց՝ Հայաստանում, պետական մակարդակով կատարվում են քայլեր, որոնք կարելի է այլ հարթակում լուծել՝ փոխըմբռնման ու բանակցությունների միջոցով՝ հաշվի առնելով համապատասխան իրավական ակտերը։ «Նման պարտիզանական գործողությունները վայել չէ որեւէ պետական կառույցի: Հայ ազգի երկու հատվածների միջեւ անընդունելի է նման պահվածքը, վերաբերմունքը: Քաղաքական կամք եւ պատասխանատվություն է պետք ՀՀ իշխանությունների կողմից, որպեսզի մենք ծաղրածու չդառնանք ամբողջ քաղաքակիրթ աշխարհի առջեւ: Մենք հստակ կարող ենք ասել, որ արցախյան կողմը պատրաստ է բոլոր տեսակի քաղաքակիրթ հարաբերություններին»:
Կարդացեք նաև
Արցախի հարցը Գագիկ Բաղունցի համոզմամբ, հնարավոր չէ փակել, իրենք էլ վերադարձի հարցը մշտապես պահելու են օրակարգում։
Ինչ վերաբերվում է Բաքվու գերեւարված Արցախի ռազմաքաղաքական ղեկավարությանը վերադարձնելուն ուղղված ՀՀ իշխանությունների ջանքերին, բանախոսը նկատում է․ «Բավական է ասել, որ այնպիսի հզոր հնարավորություն, որ ունի ՀՀ իշխանությունը՝ բանակցային գործընթացում առանցքային խնդիրներից մեկը դարձնել Արցախի ռազմաքաղաքական ղեկավարության վերադարձը, չի օգտագործվում, ինչը կարծում եմ լուրջ բացթողում է»։
Մանրամասները՝ տեսանյութում
Նելլի ԳՐԻԳՈՐՅԱՆ
Լուսանկարը՝ «Ապառաժի»
