«Ինչու Տավուշից սկսեցինք սահմանազատումը: Խորհրդային տարիներին Իջեւանից Նոյեմբերյան տանող մայրուղին անցնում էր ՀՀ տարածքով հետո Կիրանցի մոտ մտնում ադրբեջանական տարածք, հետ գալիս Կիրանց, մինչեւ Ոսկեպար հասնելը 4 տեղ մտնում ադրբեջանական տարածք: Իսկ Ոսկեպարից դեպի հյուսիս շատ մոտ էր սահմանին մինչեւ Բաղանիս- Այրում գյուղը: Երբ 90-ականների պատերազմը սկսվեց ադրբեջանական զորքերը գնդակոծում էին մայրուղով անցնող հայկական բեռնատարներին ու մեքենաներին:
Ունեցանք զոհեր ժամանակին, որ այս ճանապարհի անվտանգությունն ապահովվի…երբ Ալիեւը համաձայնեց, որ բանակցությունները գնալու են Ալմա-Աթայի հռչակագրի հիման վրա, մենք պետք է վերադառնայինք խորհրդային սահմաններին: Մենք վերադարձրինք երկու առանձին գյուղեր, ճանապարհի մի մասը, ոչ այն մասը, որ մտնում էր Ադրբեջան դուրս գալիս:
Ադրբեջանն էլ վերադարձրեց գրաված տարածքի մի փոքր մաս Բերքաբերի հյուսիսից՝ մնացորդը պահելով մինչեւ այդ գրաված ճանապարհներից դուրս գանք ու համաձայնության գանք, ինչպես այդ գործը կատարենք: Երկու ճանապարհ ունենք, եթե Ադրբեջանը այդ ճանապարհի տարածքը հանձնի ՀՀ-ին, պատրաստ ենք դրա փոխարեն նույն չափի տարածք փոխանակել իրենց հետ, որ դյուրություն ունենանք մեր ճանապարհներից օգտվելու:
Ադրբեջանն էլ խնդիր ունի, չի արտահայտվում, քանի որ եթե Բերքաբերից գրաված տարածքը մեզ վերադարձնի իրենց գյուղեր տանող ճանապարհը ՀՀ-ով են անցնելու»,- «Հայաստանի ազգային անվտանգությունը. ընթացիկ զարգացումներ»,- պանելային քննարկման ժամանակ այսօր ասաց քարտեզագետ Ռուբեն Գալիչյանը:
Կարդացեք նաև
Նրա խոսքով, Տավուշում սահմանազատման գործընթացից ՀՀ-ն շահել է, իսկ ինչ է շահել, այն, որ եթե ադրբեջանական գյուղերը չվերադարձվեին, Ադրբեջանը միջազգային դատարան էր դիմելու ընդդեմ Հայաստանի:
Իսկ ինչ ուղղությամբ շարժվել, ըստ քարտեզագրի՝ Տավուշից մինչեւ Իրանի սահման տարածքներ ունենք, որից մոտ 230 կմ Ադրբեջանը գրավել է: Այդ գրաված տարածքը բնակելի չէ, այլ ռազմավարական շատ կարեւոր նշանակության բարձունքներ են. «Եթե կարողանանք Կիրանցի շրջանի սահմանազատումը վերջացնելուց հետո շարունակենք դեպի հարավ, որտեղ ադրբեջանցիները ներխուժել են մեր տարածք: Այ այդ ժամանակ կերեւա, Ադրբեջանը դո՞ւրս է գալիս մեր սահմաններից, թե՞ Կիրանցով հարցը փակում է»:
Արփինե ՍԻՄՈՆՅԱՆ
