«Հայաստանի ներկայացուցիչները չեն մասնակցել ՀԱՊԿ զորավարժություններին, սակայն, մենք դեռ ՀՀ-ին համարում ենք իրավահավասար գործընկեր կազմակերպության ձևաչափում, Երևանի գործընկերների հետ պատրաստ ենք երկխոսության առկա խնդիրների թեմայով», – «Դաշնակիցներ. ՀԱՊԿ» հանդեսին տված հարցազրույցում նշել է ՀԱՊԿ գլխավոր քարտուղար Իմանգալի Տասմագամբետովը:
Հիշեցնենք՝ Համաշխարհային հայկական գագաթնաժողովի շրջանակում պանելային քննարկման ընթացքում Նիկոլ Փաշինյանն ասել է. «ՀԱՊԿ-ում մեր անդամակցությունը սառեցրել ենք ոչ միայն այն պատճառով, որ ՀԱՊԿ-ը չի ապահովում ՀՀ-ի նկատմամբ իր ունեցած անվտանգային պարտավորությունները, այլև այն պատճառով, որ մեր կարծիքով՝ ՀԱՊԿ-ը ստեղծում է սպառնալիքներ ՀՀ անվտանգության, Հայաստանի հետագա գոյության, ինքնիշխանության և պետականության համար»:
Վարչապետը նշել է՝ ՀԱՊԿ-ում գործունեությունը լիարժեք կվերականգնեն, երբ Հայաստանի հնչեցրած հարցերին հնչեն հստակ պատասխաններ. «Անընդհատ քննարկվում է՝ արդյոք Հայաստանը փորձում է կամ մտածում է ՀԱՊԿ վերադառնալու մասին: Մենք լիարժեք կվերականգնենք մեր գործունեությունը ՀԱՊԿ-ում միայն այն պարագայում, երբ մեր բարձրացված հարցերին հնչեն կոնկրետ պատասխաններ: Մեր այդ շեշտադրումից անցել է երկու տարի, պատասխանները ոչ միայն չեն հնչել և արդեն ակնհայտ է, որ չեն հնչելու: Կամ, եթե նույնիսկ ակնհայտ չէ, բայց ես կարող եմ ասել, որ ինչքան այդ պատասխանները չեն հնչում և դրանք համոզիչ չեն, ամեն վայրկյան Հայաստանն ավելի ու ավելի է հեռանում ՀԱՊԿ-ից»:
