Համաշխարհային հայկական գագաթնաժողովի շրջանակում պանելային քննարկման ընթացքում անդրադառնալով Բաքվի դժգոհություններին, թե Փարիզը զինում է Երևանին՝ Հայաստանի վարչապետը հարցադրում արեց. «Հետաքրքիրը գիտեք ի՞նչն է։ Նրանք ասում են՝ Արևմուտքը զինում է Հայաստանին։ Կներեք, բայց որ Ադրբեջանը Չեխիայից, Սլովակիայից, Իտալիայից զենք է գնում, երբվանի՞ց այդ երկրներն այլևս Արևմուտք չեն։
Ինչո՞ւ Ադրբեջանը կարող է Իտալիայից, Չեխիայից, Սլովակիայից զենք գնել, իսկ Հայաստանը չի կարող Ֆրանսիայից զենք ձեռք բերել։ Ինչո՞ւ Ադրբեջանը կարող է Պակիստանից զենք ձեռք բերել, իսկ Հայաստանը Հնդկաստանից չի կարող»։
Նա ընդգծեց՝ Հայաստանի խնդիրն է իր 29 հազար 743 քառակուսի կիլոմետր ինքնիշխան տարածքի պաշտպանությունը. «Այս իրավունքը երաշխավորված է ՄԱԿ-ի կանոնադրությամբ, և ՄԱԿ-ի և միջազգային այլ կազմակերպությունների փաստաթղթերը պետության վրա դնում են պարտավորություն ապահովելու իրենց քաղաքացիների անվտանգությունը և մենք այս պարտավորությունները կատարելու ենք»։
