Կարատեի աշխարհի ու Եվրոպայի չեմպիոն, MMA մարտարվեստի մրցաշարերում 7 հաղթանակ տարած (6-ը՝ նոկաուտով) եւ ոչ մի պարտություն չկրած Կամո Ունանյանը մտադիր է պահպանել Հին Աշխարհամասի չեմպիոնի տիտղոսը սեպտեմբերի 9-ից 13-ը Լեհաստանում կայանալիք Եվրոպայի առաջնությունում:
Այսօր «Սպուտնիկ Արմենիայում» կայացած մամուլի ասուլիսում Կամո Ունանյանը պատմեց մարզումների ընթացքում առկա դժվարությունների, դրանք հաղթահարելու վճռականության եւ իր ապագա ծրագրերի մասին: Վերջին շրջանում նա միայն մեջքի չորս բարդ վիրահատության է ենթարկվել, չհաշված բազմաթիվ այլ վնասվածքները: Սակայն անկախ ամեն ինչից շարունակում է մարզվել ծանրաբեռնվածությամբ, քանի որ առանց դրա հաջողությունների հասնելը բացառված է: Նա նշեց, որ չնայած Եվրոպայի առաջնությանը շատ կարճ ժամանակ է մնացել, իսկ ինքը դեռ շարունակում է բուժումները, սակայն դրանք համատեղում է տքնաջան մարզումների հետ եւ գիտի ինչպես անել, որպեսզի Եվրոպայի առաջնության ժամանակ լինի լավ մարզավիճակում, իսկ իր ռինգ մտնելու օրը՝ մարզավիճակի գագաթնակետին:
Կամո Ունանյանը նշեց, որ չնայած արդեն դուրս է եկել երիտասարդական տարիքից, դեռ իրեն առույգ է զգում եւ մտածում է նոր նվաճումների մասին, որպեսզի երբ, այնուամենայնիվ, վրա հասնի ակտիվ մարզական կարիերային հրաժեշտ տալու պահը, չզղջա, որ կարող էր այսինչ բանն էլ անել, բայց չարեց:
Կարդացեք նաև
Կամո Ունանյանը Հայաստանում իր մարտարվեստում եւ մյուս մենապայքարային մարզաձեւերում տեսնում է շնորհալի եւ հեռանկարային երիտասարդների եւ վստահեցնում է, որ հատկապես օլիմպիական ընտանիքում տեղ գտած կարատեն ու մյուս մարտարվեստները զարգացնելու համար հնարավոր ամեն ինչ արել, անում եւ անելու է իր ընկերների հետ միասին: Մասնավորապես, նա մտադիր է եկող տարի Հայաստանում MMA-ի իր մրցաշարը կազմակերպել, մանավանդ, որ ունի լայն կապեր թե աշխարհին անվանի տիտղոսակիր մարզիկների, թե հայտնի պրոումոթերական ընկերությունների ղեկավարների հետ: Մնում է միայն գումարի հարցը լուծել:
Կամո Ունանյանը խոսեց նաեւ ռինգից դուրս տեղի ունեցող երեւույթների մասին: «Այո, սպորտը իմ կյանքն է: Բայց սպորտի հետ մեկտեղ կան սկզբունքներ, որոնք ես ոչ մի պարագայում չեմ փոխում, գոյություն ունի արժանապատվություն եւ պատիվ, որը ցանկացած տղամարդ պետք է պահպանի: Եվ վերջում ուզում եմ դիմել Հայաստանի մարզիկներին: 2022 թվականի պատերազմից հետո մարզաշխարհում մեր մարզիկները պետք է առավելագույնը անեն հաղթանակների համար, որպեսզի մեծարեն մեր երկիրը, հայրենիքը, բարձրացնեն Հայաստանի դրոշը: Մենք դրա կարիքն ավելի ունենք, քան երբեւէ: Դա հայ մարզիկների առաջադրանքը պետք է լինի, որպեսզի աշխարհը երկրագնդի տարբեր կետերում լսի հայի, Հայաստանի անունը, տեսնի հայկական դրոշը»,- ասաց աշխարհի ու Եվրոպայի չեմպիոնը:
Աշոտ ՀԱԿՈԲՅԱՆ
