Երևան քաղաքի դատարանի «Շենգավիթ» նստավայրի մոտ այսօր ԱԺ ՔՊ-ական պատգամավոր Հովիկ Աղազարյանին մոտեցավ զոհված զինվորի մայր ու դժգոհեց, որ ասելիք ունի, սակայն պատգամավորը չէր ցանկանում լսել իրեն:
«Եթե վիրավորական բառեր չասեք, ես ձեզ կլսեմ»,- արձագանքեց Հովիկ Աղազարյանը:
«Իմ տղայի մարմնի նույնականացումից հետո 5 ամիս խոշտանգել են Հայաստանի, չեմ ուզում անունը տալ, թե որտեղ»,- շարունակեց զոհվածի մայրը:
«Ովքե՞ր են խոշտանգել»,- հետաքրքրվեց պատգամավորը:
Կարդացեք նաև
«Ովքե՞ր են խոշտանգում, երբ մարմին կա: Կա նույնականացում: Ծնողը Հանրապետության հրապարակի գետիններն էր լիզում, ինչպես ասել էին՝ գետիններն եք լիզելու, ես իրոք այդ ժամանակ լիզում էի, խնդրում էի, թե բալիս եմ ուզում: Ու ինձ չէին ասում՝ քո բալեն Հերացիում է, նույնականացված: 5 ամիս այնպես են խոշտանգել, որ չեմ կարողանում ճանաչել բալիս: Այդ հարցով 3 տարի առաջ գլխավոր դատախազին եմ դիմել, ոչ մեկ չի անդրադարձել, չի հարցրել՝ ծնող ի՞նչ խնդիր ունես, ես էդ դեպքով դեռ տուժող չեմ»,- պատասխանեց զոհված հերոսի մայրը:
Ի պատասխան՝ Հովիկ Աղազարյանն ասաց, որ իր երեւակայությունը չի հերիքում, որ պատկերացնի՝ ինչ ասել է խոշտանգում տվյալ դեպքում. «Եթե գտնում եք, որ որպես պատգամավոր, կարող եմ օգտակար լինել ձեր մայրական ցավը սպիացնելու գործում, խնդրեմ, դիմում գրեք, ուղարկեք ինձ, ես ամեն տեղ կլինեմ ձեր կողքին»:
«Այ, որ ասում եք՝ չեք պատկերացնում խոշտանգումը, ես ունեմ նկարներ, ինչ վիճակում է տվել թուրքը, ինչ վիճակում է տվել հայը ինձ իմ որդուն: Երկու նկար ունեմ, էնքան պարզ է խոշտանգումը»,- արձագանքեց զոհված հերոսի մայրը:
Արփինե ՍԻՄՈՆՅԱՆ
